आज देशैभरि सरस्वति पूजन मनाईदै, जनकपुरमा प्रशासन र बजरँग दलको कडा प्रभाव

न्यूज ब्यूरो, जनकपुरधाम । हरेक वर्ष माघ शुक्ल पञ्चमीका दिन मनाईने सरस्वति पूजा आज धुमधामको साथ मनाइदैछ ।

विद्या र सिर्जनाकी देवी भएकाले विशेष गरी साहित्यकार, कलाकार, पत्रकार, शिक्षक, विद्यार्थीलगायतले आ–आफ्ना कला साधनाका वस्तु कलम, कापी, कुची र वाद्ययन्त्र आदिलाई सरस्वतीका रूपमा पूजा गर्छन् ।

सूर्य उत्तरतिर लागि दिन लामो हुने र वसन्त ऋतु प्रारम्भ हुने भएकाले आजको दिनलाई ‘वसन्त पञ्चमी’ पनि भनिन्छ । आजका दिन विवाह, व्रतबन्ध, गुफा राख्ने र बेलविवाहजस्ता सामाजिक तथा धार्मिक कार्य गर्न साइत हेर्नुपर्दैन भन्ने मान्यता छ । यस दिन बालबालिकालाई शिक्षारम्भ गराउने र नाक–कान छेड्न पनि शुभ मानिन्छ । देशभरकै सरस्वती मन्दिरमा बिहानैदेखि पूजा गर्न भक्तजन, विद्यार्थीको घुइँचो छ ।

यस्तै, वसन्त पञ्चमीको अवसरमा मिथिलाञ्चलका किसानले हलो र गोरुको पूजा गर्दैछन् । आजका दिन तराई मधेश तथा सम्पूर्ण मिथिलाञ्चलभरका किसानका लागि पर्व र ठूलो मेलाको दिन मानिन्छ ।

यता, जनकपुरमा प्रशासन र बजरँग दलको कडा प्रभाव देखिएको छ । अन्य बर्षहरुमा सरस्वति पूजाको अवसरमा हुने उच्छृँगल गतिविधिमा भारी गिराबट देखिएको छ । बिहानैदेखि पूजा आस्था कम र देखावटीपनमा उत्रने विद्यार्थीहरु यसपाली विद्यालयको पोशाकमा सौहार्द कायम गरेको देखिएको छ ।

प्याबसन र एनप्याबसनले अनिवार्य रुपमा विद्यालयमा पोशाकमै आउन निर्देशन दिएपछि स्कूल कलेजका विद्यार्थीहरु अघिल्लो बर्षजस्तै शैली देखाउन पाएका छैनन् । धनुषा जिल्ला प्रशासनले समेत चर्को स्वरमा डिजे बजाउने, अश्लिल गीत बजाउने, उच्छृँगल गतिविधि गर्नेलाई ठाउँको ठाउँ कारवाही गर्ने भनेपछि अवस्था नियन्त्रणमा रहेको देखिएको छ ।

आजकै दिन भ्यालेन्टाइन डे समेत परेको र त्यसको लागि बजरँग दलले पूजा बाहेक अन्य त्यस्ता गतिविधि गरेको पाईएमा धुलाई गर्ने धम्की दिएपछि विहान १० बजेसमम अवस्था समान्य रहेको देखिएको छ ।