भयँकर निन्द्रामा कमला नगरपालिका, वडाध्यक्षहरुको कानमा तेल, आउँदैनन कर्मचारी

न्यूज ब्यूरो, जनकपुरधाम । स्थानीय तहको संरचनापछि नै विवादित रहँदै आएको पूर्वी धनुषाको कमला नगरपालिकाको सँचालन गति कछुवाभन्दा पनि ढिलो देखिएको छ ।

६ बर्षको अन्तरालमा कहिलेपनि समयमा नगरसभा गर्न नसकेको कमला नगरपालिकाले चालु आर्थिक बर्षको कार्य सँचालनलाई कछुवाभन्दा पनि स्लो गतिमा कार्य सँचालन गरिरहेको छ ।

गत पुस १५ गतेमा बजेट ल्याएको कमला नगरपालिकाले माघ मसान्तको अन्तिमसम्म समेत योजना सूचिकृत गर्न सकेको छैनन् । वडाध्यक्षहरुले अहिलेसम्म योजना पेश नगर्दा योजना सँचालनको बाधा बनेको हो ।

नगरपालिकाका नगर प्रमुख विशेश्वर यादवले नगरसभा सम्पन्न भएपछि विभिन्न वडासँग मागेको योजनाको सूचि अझै पेश नगर्दा योजना सूचिकृत हुन नसकेको बताईएको छ । ९ वटै वडाध्यक्षहरुले अहिलेसम्म वडास्तरीय सिलिँग अनुसार योजना पेश नगर्दा सुत्रमा इन्ट्री गर्न सकिएको छैनन् । सुत्र इन्ट्रीपछि मात्र योजनाहरु सँचालन हुने नियम रहेको छ ।

केही वडाध्यक्षहरुले नगरपालिकामा योजना पेश गरेपछि केही दिने तरखरमा रहेका छन् । केहीले मात्र योजनाको नाम पेश गरेपनि लागत बजेट भने छुटयाएर नदिदा झन ढिलाई भएको हो ।

योजना तर्जुमा नै नगरी योजना पेश गर्ने प्रवृतिको कारण मुख्य विकास निर्माणका कार्यहरु प्रत्येक बर्ष प्रभावित हुने गरेको छ । आफ्नै तालमा बनाइने योजना, सहकर्मी राखेर घरमै बसी बसी निर्माण गर्ने योजना, आफू र कार्यकर्ता अनुकूल मात्र तयार पारिने योजनाको कारण कमलाको विकास अझै बर्षौ पछाडी परेको गुनासो आम नागरिकको छ ।

यता, कपाली तमसुकको कारण योजना दिन ढिलाई भएको वडाध्यक्षहरु बताउँछन् । कपाली तमसुक दर्ताको भीडको कारण समयमा योजना दिन नसकिएको वडा नं. ३ का वडाध्यक्ष रामभगत यादवले बताए । उनले माथिल्लो तहबाट बीच बीचमा नयाँ नयाँ कार्यभार आउन थालेपछि यहाँको काम प्रभावित भएको बताए ।

वडाध्यक्ष यादवले माघ ११ गतेसम्म कपाली तमसुकको अत्यधिक भीडको कारण योजना बनाउन नसकिएको बताए । योजनाहरु बनाउँदै गर्दा बीचमा कपाली तमसुक दर्ताको लागि चाप बढेपछि ढिलाई भएको बताउँदै २ दिनभित्र सबै योजनाहरु पेश हुने बताए ।

वस्तीस्तरबाट लिनुपर्ने योजनाको लागि वस्तीस्तरीय बैठक भने कुनै जनप्रतिनीधिले गर्दैनन् ।

कमला नगरपालिकाको कार्यपालिका सदस्यहरुसहित अन्य अधिकांश कर्मचारीहरु कार्यालय नआउँदा नगरपालिका अपाँग भएको हो । जनताको सेवासँग प्रत्यक्ष सरोकार राख्ने सरोकारबाला कर्मचारी नै नियमित कार्यालय नआउँदा कमला नगरपालिका अपाँग भएको हो ।

नियमित कार्यसँग सम्बन्धित कर्मचारीहरु आफुखुसी नगरपालिका आउने प्रवृति मौलाउँदै जाँदा आम जनताको आक्रोस बढदै गएको हो । यसको लागि नगर प्रमुखले समेत पहलकदमी गरेको देखिदैनन् । नियमित कार्यालय नआउने कर्मचारीलाई कारवाही नगरेसम्म प्रवृति नसुध्रिने गुनासो गरिएको छ ।

यस सन्दर्भमा कमला नगरपालिकाका प्रमुख प्रशासकीय अधिकृत सँतोष मिश्रले कर्मचारीहरुलाई चेतावनी दिएको बताए । उनले नियमित कार्यालय नआउने, बहाना बनाउने प्रत्यक्ष सरोकारका कर्मचारीहरुलाई अन्तिम चेतावनी दिएको बताउँदै अब त्यस्तो गरेको खण्डमा नियम बमोजिम कारवाही गरिने बताए ।

नगर प्रमुख विशेश्वर यादवले समेत कर्मचारीहरु नियमित रुपमा आएपनि केही कर्मचारीहरु अटेरी गरेको बताए । उनले ती कर्मचारीहरुलाई ट्रयाकमा ल्याउने काम भईरहेको बताए ।