'मिया वाकी' प्रविधिबाट कमला नदीमा जँगल लगाउनु आफैँमा प्रशँसनीयः महामन्त्री थापा

न्यूज ब्यूरो, जनकपुरधाम । नेपाली काँग्रेसका महामन्त्री एवम् संघीय साँसद गगन कुमार थापाले कमला बचाउ अभियानलाई राष्ट्रियस्तरबाट सहयोग गर्ने प्रतिवद्धता जाहेर गरेका छन् ।

मँगलबार धनुषाको कमला नगरपालिका वडा नं. ५ स्थित वृक्षारोपणमा सहभागी हुँदै नेता थापाले कमला नदी दोहन रोक्न र बचाउको लागि अभियानका सँयोजक विक्रम यादवले गरेको पहललाई खुलेर प्रशँसा गरे ।

उनले २ बर्षमा आफूले नै रोपेको विरुवाको जँगल हेर्न पाउने र पुनः तस्विर खिचाउन पाइने भएपछि उनले अभियानप्रति कृतज्ञता प्रकट गरे ।

कमला बचाउ अभियानको पहलमा कमला नगरपालिका वडा नं. ५ स्थित निर्माणधीन कमला मन्दिरको पछाडी प्राँगनमा “मिया वाकी” प्रविधिबाट जँगल लगाउने कार्य सुरु भएपछि उनले यस्ता प्रविधिबारे आफू पहिलो पटक सुनेको बताए ।

कमला बचाउ अभियानको पहलमा मिथिला वाईल्ड लाईफ ट्रस्टद्धारा आजबाट सुरु भएको “मिया वाकी” प्रविधिको वनजँगल लगानको उदघाटनमा महामन्त्री थापाले कमला बचाउ अभियानका सँयोजक विक्रम यादवको प्रशँसा गरे । उनले ट्रस्टका अध्यक्ष देव नारायण मण्डलसहित समन्वय गरेका प्रदेश वन निर्देशनालय, डिविजन वन कार्यालयका अधिकृत एवम् वृक्षमानवका उपाधी पाएका पर्यावरण अभियानी सुरेश शर्माको खुलेर प्रशँसा गरे ।

महामन्त्री थापाले कमलाको बालुवा (बगर) मा समेत २ बर्षभित्र रोपिएको विरुवा जँगलको रुप लिने भएपछि आफू तस्विर खिचाउन २ बर्षपछि पुनः आउने प्रतिवद्धता जाहेर गरे ।

सोही क्रममा कमला बचाउ अभियानकै पहलमा कमला नपा ४ र ५ को बीचमै पर्ने मुसहरी टोलस्थित निर्माण गरिएको समुदायिक सिकाई केन्द्रको उदघाटन गरे । नेता थापाले स्थानीय मुसहर बालबालिकाहरुलाई निरन्तर र नियमित पढनुपर्ने सल्लाह दिए ।

कमला नगरपालिका वडा नं. ५ लक्कडस्थित पासमान टोलमा समेत निर्माण गरिएको सामुदायिक सिकाई केन्द्रको समेत उदघाटन गरे । कमला नगरपालिका वडा नं. ५ का वडाध्यक्ष शिवा पासवानको अध्यक्षता तथा नेता थापाको प्रमुख आतिथ्यमा उदघाटन गरियो ।

“मिया वाकी” प्रविधिबाट सुरु गरिएको वृक्षारोपणको लागि कमला नगरपालिकाका मेयर विशेश्वर प्रसाद यादवको अध्यक्षता गरेका थिए । उनकै विशेष उपस्थितिमा वृक्षारोपण गरिएको थियो ।

सोही क्रममा बोल्दै वन निर्देशनालयका अधिकृत सुरेश शर्माले कमला जस्तो वञ्जर जमिनलाई हराहर गरी यहाँको आम जनजीवनलाई सहज पार्ने उदेश्य रहेको बताए । उनले विश्वव्यापी रुपमा ग्लोबल वार्मिँग अर्थात दिनानुदिन तापक्रम बढदै जानु खतराको सँकेत रहेको बताए । उनले मानवजाती र नयाँ पीढीलाई नयाँ जीवन दिनको लागि पर्यावरण अपरिहार्य भएको बताए ।

वृक्षारोपण कार्यक्रममा जम्मा १०८ प्रकारको वृक्षारोपण गरिएको मिथिला वाईल्ड लाईफ ट्रस्टका अध्यक्ष मण्डलले बताए । २ बर्षमा सो विरुवाहरु करिब १५ फिटसम्मको हुने बताउँदै २ बर्षमा जँगलजस्तो देखिने र आसपासका खेतबारी समेत हरियाली हुने बताए ।

कार्यक्रममा नेपाली काँग्रेसका धनुषा सभापति योगेन्द्र पँजीयार, पूर्व प्रदेश मन्त्री रामसरोज यादव, काँग्रेसका नेता जीवनाथ चौधरी, मेयर विशेश्वर प्रसाद यादव, जनकपुरधामका मेयर मनोज साह, जनकनन्दिनी गाउँपालिका वडा नं. २ का वडाध्यक्ष अब्दुल मालिक, वडा नं. ४ का वडाध्यक्ष दिलिप यादव, कमला नपा ४ का वडाध्यक्ष पप्पु गोहिबार, विभिन्न पालिकाका नेपाली काँग्रेसका नेता कार्यकर्ताहरु, जिल्लास्तरीय नेता, प्रदेश साँसद, प्रदेश मन्त्रीहरुको सहभागीता रहेको थियो ।