आज प्रभु साहको मधेश बन्दको घोषणा, जनकपुरमा प्रभाव शून्य

न्यूज ब्यूरो, जनकपुरधाम । आम जनता पार्टीका अध्यक्ष प्रभु साहले आज (विहिबार) घोषणा गरेको मधेश बन्दको प्रभाव जनकपुरमा शून्य देखिएको छ ।

बन्द बन्द घोषणाको पूर्व सन्ध्यामा मधेश प्रदेशको राजधानी जनकपुरधामस्थित प्रदेशको विभिन्न स्थानमा मशाल जुलुस प्रदर्शन गरेको थियो । एक महिना अगाडी नै नेता प्रभु साहले पत्रकार सम्मेलन गरी माघ ११ गते मधेश बन्दको घोषणा गरेका थिए ।

आज देशको सातवटै प्रदेशमा राष्ट्रियसभाको निर्वाचन भईरहेको बेला प्रभु साहले मधेश बन्दको आह्वान गरेको हो । यद्यपी, यसको प्रभाव भने देखिएको छैनन्, छिटफुट रुपमा प्रभाव देखिएको छ ।

बैंकले मनोमानी ढंगले लिइ रहेको ब्याज फिर्ता, लघुबित्त तथा सहकारीबाट लिएको कर्जा माफी तथा आम जनतालाई सहज कर्जा उपलब्ध गराउने लगायतका माग सहित आजपाले बिहिबार मधेस बन्दको आह्वान गरेको हो ।

आम जनताको भविश्य र देशको समृद्धिसंग खेलवाड भईरहेकाले बाध्य भएर आन्दोलित हुनु परेको आजपाले जनाएको छ । आजपाका कार्यकर्ताहरुले बुधबार विभिन्न स्थानमा मोटरसाइकल रैली समेत निकालेको थियो ।

यता, सोहि पार्टीको युवा दस्ता आईटी आर्मीद्वारा बुधवार जनकपुरबाट मधेश सफाई अभियान थालनी गरेको छ । जनकपुरधामका आफना युवा दस्ता ल्याएर आईटी आर्मीले जानकी मन्दिर प्राङ्गणमा सरसफाई गर्नुका साथै युवा दस्ता सार्वजानिक गरेको छ । आईटी आर्मीले आज जनकपुरबाट सफाई अभियान शुरू गरेको बताएको छ ।

आईटी आर्मीका संयोजक चन्द्र भुषण साहले बैंकिंग लुटको विरुद्ध माघ ११ गतेको मधेश बन्दलाई सफल पार्न जनकपुर आएको आईटी आर्मीका कमाण्डरहरुले जानकी मन्दिरबाट मधेश प्रदेश सरकारको भ्रष्टाचार, बेथीति र गन्दगीलाई जसरी पनि सफा गरेर छाडने संकल्प एवं प्रतिबद्धता व्यक्त गर्दै सफाई अभियान थालिएको बताए ।