जनकपुरधामको बिन्धीमा तीन दिवसीय महावीर झण्डा मेला सुरु

न्यूज ब्यूरो, जनकपुरधाम । जनकपुरधाम उपमहानगरपालिका वडा नम्बर २३ बिन्धीमा शनिबारदेखि महावीर झण्डा मेला प्रारम्भ भएको छ ।

शनिबार झण्डै सयौंको संख्यामा कलससहितको शोभा यात्रा गर्दै श्री श्री १०८ श्री महावीर झण्डा ठड्याइएको हो । झण्डा ठड्याएसंगै तीनदिवसीय मेलाको विधिवत सुरुवात भएको हो ।

मेलामा शनिबारदेखि नाचगानसहितका सांस्कृतिक कार्यक्रमसहितको मेलामा विभिन्न झुला रहेको मेला व्यवस्थापन समितिका संयोजक राम इश्वर कापरले बताएका छन् । झण्डाको निर्माता राम चरन कापर छन् । उहाँले आफ्नो निजि पैसाबाट सो झण्डा बनाएका हुन् ।

यो मेला जनकपुरधाममा छुट्टै पहिचान बनाएको संस्कृतिक उत्सवको रुपमा रहेको स्थानीयहरु बताउँछन् । बजरंगबली अर्थात हनुमानजीको प्रतिकको रुपमा बाँसद्वारा झण्डा निर्माण गरेर सामुदायिक रुपमा वैदिक विधि अनुसार यसको पुजा आराधना गरी सर्वसाधारणहरुको दर्शनका लागि स्थापना गरेका छन्।

बजरंगबलीको झण्डा खण्ड– खण्डमा कलात्मक ढंगबाट विभिन्न रंगीचंगी कागज , फोंटो र विभिन्न प्रकारका आकर्षक आकृतिहरु टाँसेर आकर्षक बनाइएको झण्डा मिस्त्री राम सोगारत साहले बताएका छन् । मुख्य मिस्त्री राम सोगारत साहसहित महेश साह, पन्चा मण्डल, धनेश्वर साह चार जनाको टोलीले झण्डा तयार गर्नमा झन्डै १ महिना लागेको हो।

यस मेलाले मेलमिलाप र आपसी सद्भावको वातावरण बन्ने गरेको छ । भक्ति, साहस र पराक्रमका लागि सम्झिने त्रेताकालीन रामभक्त हनुमानलाई मिथिलामा विघ्ननाशक, सङ्कटमोचन, महावीर र पवनदूतसहितका नामले स्मरण गरिन्छ ।

महावीरको नाममा झण्डोत्सव मेलाको आयोजना गरिंदा नगर,गाउं, वस्तीमा कुनै आपत्त विपत्त नआउने र परिवार तथा समाजमा सुख शान्ति छाउने तथा दुष्ट प्रवृतिको नाशहुने जनविश्वासले गर्दा झण्डा मेला लाग्ने गरेको छ।