काँग्रेसका नेता राजकिशोर सिँह राजपूतको शालिक अनावरण गर्न धनुषा आउँदै शेरबहादुर देउवा

न्यूज ब्यूरो, जनकपुरधाम । नेपाली काँग्रेस पार्टीमा जीवन बिताई स्वर्गारोहन भएका धनुषाका नेता राजकिशोर सिँह राजपूतको शालिक अनावरणको लागि काँग्रेसका सभापति शेरबहादुर देउवा धनुषा आउने भएका छन् ।

भोली सोमबार धनुषाको औरही गाउँपालिकाको औरहीस्थित निर्माण गरिएको शालिक र पार्क अनावरणको लागि पूर्व प्रधानमन्त्री समेत रहेका नेता देउवा हेलिकप्टर मार्फत धनुषा आउने भएका छन् ।

सोमबार दिउँसो १२ः३० बजेको समयमा औरहीस्थित समुदायिक विद्यालयमा हेलिकप्टर मार्फत ल्याण्ड गर्ने जनाईएको छ । काँग्रेसका दिग्गज नेता मानिएका राजपुतको शालिक अनावरणको लागि देउवा प्रमुख अतिथि रहने कार्यक्रम तय भएको हो ।

देउवा आउने भएपछि काँग्रेसका साँसद, नेता, मन्त्रीहरु समेत सो कार्यक्रममा सहभागी हुने बताईएको छ ।

जिउँदो हुँदा नेपाली काँग्रेसमै जिवन बिताएका राजकिशोर सिँहले गत बर्ष मँसिर १ गतेको दिन उनले अन्तिम साँस लिएका थिए । उनका छोराहरुले उनको नामको शालिकसहितको पार्क बनाईदिएका हुन् ।

श्रीमति ईन्द्रा सिँह, छोरा सँदीप कुमार सिँह, बुहारी शर्मिला पौडेल सिँह, छोरी नितु सिँह, अनु सिँह र ज्वाई सँजय सिँह एवम् अमित सिँहले सँयुक्त रुपमा धनुषाको औरहीमा स्मृति स्थल निर्माण गरेका हुन् ।

काँग्रेस पार्टीमा हुँदा उनले आफ्नो क्षेत्रका जनतालाई निरन्तर आवश्यक सहयोग गरेको भावनाले उनलाई एक असल नेताको दर्जा दिइन्छ ।

शालिकसहित पार्कस्थल निर्माण र अन्य सबै कार्यक्रमको लागि उनका छोराछोरी र ज्वाईँले खर्च उठाएका हुन् ।