रामराजा प्रसाद सिँह प्रतिष्ठान सुधार्न सप्तरी युथले लाईट बालेर स्वास्थ्यमन्त्री खोज्दै

न्यूज ब्यूरो, राजविराज । सप्तरीको सदमुकाम राजविराजस्थित रहेको रामराजा प्रसाद सिँह स्वास्थ्य विज्ञान प्रतिष्ठानको अवस्था सुधार गर्न सप्तरी युथले दिउँसै लाईट जलाएर स्वास्थ्यमन्त्री खोजेका छन् ।

सप्तरी युथ नेपाल नामक समूहका युवाहरुले बुधबार रामराजाप्रसाद सिंह स्वास्थ्य विज्ञान प्रतिष्ठानको काम अविलम्ब सुरु गर्न माग गर्दै दिउँसै मोबाईलको लाईट बालेर स्वास्थ्यमन्त्री खोजेको हो । अस्पताल सुधारको लागि स्वास्थ्यमन्त्रीले खासै चासो नलिएपछि सप्तरी युथले एक्सन लिएको हो ।

पूर्वनिर्धारित कार्यक्रमअनुसार बुधबार सप्तरीका युवाहरूले दिउँसै बत्ती बालेर प्रदर्शन गरेका छन्। प्रतिष्ठानको फाइल स्वास्थ मन्त्रालयमा रोकिएकाले उनीहरूले दिउँसै बत्ती बालेर स्वास्थ्यमन्त्री र सांसदको खोजी गर्दै प्रतीकात्मक आन्दोलन गरेका हुन्।

आन्दोलन समितिका संयोजक सत्येन्द्र यादवले यस विषयमा सरकार गम्भीर नहुँदा सम्पूर्ण सप्तरीवासीले दुःख पाएको भन्दै सप्तरीबाट निर्वाचित सांसदहरूलाई एक भएर प्रतिष्ठान निर्माणमा लाग्न आग्रह गरे।

निर्धारित कार्यक्रमअनुसार बिहीबार जिल्ला प्रशासन कार्यालयअगाडि एक घन्टा धर्ना दिने कार्यक्रम रहेको सप्तरी युथका कार्यबाहक अध्यक्ष मोहनकुमार यादवले बताए।

रामराजा प्रसाद सिँह स्वास्थ्य विज्ञान प्रतिष्ठान सप्तरीवासीको मात्र नभई प्रदेशको समेत धरोहर रहेको भन्दै सप्तरी युथका उपाध्यक्ष मोहन यादवले अविलम्ब सुधारको प्रक्रिया र फाईल अगाडी बढाउन माग गरे । उनले प्रतिष्ठानको फाईल मन्त्रालयमै रोकिएर राखेको विरुद्धमा एक हप्ते आन्दोलन सुरु गरेको बताए ।

भोली हुने कार्यक्रमा यादवले सप्तरीवासीलाई राजविराजमा उपस्थितिको लागि अनुरोध समेत गरे ।