कार्तिक पूर्णिमाको अवसरमा धनुषाको इनर्बामा स्वास्थ्य शिविर ५०० बढीले लिए सेवा

न्यूज ब्यूरो, जनकपुरधाम । पूर्वी धनुषाको जनकनन्दिनी गाउँपालिका वडा नं. १ ईनर्बास्थित कार्तिक पूर्णिमाको अवसरमा आयोजना गरिएको निःशुल्क स्वास्थ्य शिविरमा पाँच सय बढी श्रद्धालुहरुले सेवा लिए ।

आईतबार बिहानैदेखि सुरु गरिएको निःशुल्क स्वास्थ्य शिविरमा सोमबार साँझसम्म ५०० अधिक श्रद्धालुहरुले शिविरको लाभ उठाएको आयोजक टीमका ईन्द्रजीत गोईतले जानकारी दिए ।

गरिबी निवारण तथा वातावरण संरक्षण नेपाल धनुषाको आयोजनामा राखिएको दुई दिने निःशुल्क स्वास्थ्य शिविरमा अधिकांश श्रद्धालुहरुलाई रुघाखोकी र टाउको दुःखाईको औषधी एवम् सेवा लिएको नेविसंघका केन्द्रीय सदस्य समेत रहेका गोईतले बताए ।

उनका अनुसार, प्रत्येक वर्ष कार्तिक पूर्णिमाको अवसरमा हजारौँको सँख्यामा भक्तजनहरु ईनरवा घाट कमला स्नानको लागि जाने भएको हुँदा सो क्रममा भीड भडक्कामा हुन सक्ने शारिरिक क्षतिलाई परिपूर्ति गर्न शिविरको आयोजना गरिदै आएको बताए । शिविरमा युवा अभियन्ता उमेश यादवले सहयोग गरेका थिए ।