धनुषाको ललियामा पानी टैँकी सुचारु नहुँदा सयौँ घरधुरीलाई पानीको आपत

न्यूज ब्यूरो, जनकपुरधाम । धनुषाको मिथिलाबिहारी नगरपालिका वडा नं. ५ ललियास्थित निर्माणधीन रहेको पानी टैँकी सुचारु नहुँदा सयौँ घरधुरीलाई पानीको आपत भएको छ ।

जाडोको मौसममा चापाकलमा पानी आएपनि सुख्खा मौसममा पानीको हाहाकार हुँदै आएको अवस्थामा कर्मचारीको बदमासीले पानी टैँकी सुचारु नहुँदा झन समस्या भएको छ ।

वि.सं. २०७५ सालदेखि नै बन्दै आएको पानी टयाँकी बनेर सम्पन्न भएपनि मोटर सुचारु नगर्दा १ हजार बढी घरधुरीलाई पानीको आपत भएको छ ।

टैँकी निर्माणको लागि खानेपानी तथा सरसफाई समिति ललियाले २०७६ सालदेखि नै अनवरत काम गर्दै आएपनि पानी टैँकी निर्माण कार्यले प्रभावकारिता पाउन सकेको छैनन् ।

पानी टैँकी निर्माण कार्य सम्पन्न भएपनि सर्वसाधारण उपभोक्ताको घरसम्म अझै पानी पुग्न सकेको छैनन् । मधेश प्रदेशका तत्कालिन मन्त्री जीतेन्द्र सोनलको पालामा १ करोड बढीको लागतमा सो पानी टैँकी निर्माण गरिएको हो ।

पानी टैँकी निर्माण गरेर शो–पिसमा राखिएको स्थानीयहरुको गुनासो छ । पानी टैँक निर्माण सम्पन्न गरी त्यतिकै थाती राख्दा यहाँका स्थानीयहरुलाई पानीको समस्या भएको स्थानीय सुरेन्द्र साहले बताए । उनका अनुसार, सोको लागि साईट ईन्जिनीयर सुरेन्द्र शर्माले व्यक्तिगत स्वार्थ खोज्न थालेपछि पानी अझै अपुग भएको आरोप लगाए ।

यस सन्दर्भमा साईट ईन्जिनीयर शर्मासँग सम्पर्क गर्दा उनको मोबाईल स्वीचअफ बताएको हो ।