रुपेश सर्राफ हत्या काण्डमा ट्वीस्ट, प्रहरीले घटनालाई मोड्न खोजेको पीडित परिवारको आरोप

न्यूज ब्यूरो, बारा । बारा जिल्लाको कलैयास्थित विद्यालयका प्रिन्सिपल रुपेश सर्राफको हत्या काण्डमा प्रहरीले चुनौति थेग्न नसकेपछि घटनालाई बलपूवर्क मोड्न खोजेको आरोप लगाएको छ ।

मृतक प्रिन्सिपल रुपेश सर्राफको परिवारले बुधबार एक प्रेस विज्ञप्ति जारी गर्दै बारा प्रहरीले दिनदहाडै हत्याको चुनौति थेग्न नसकेपछि बिना प्रमाण व्यक्तिहरुलाई फँसाएको आरोप लगाएको छ । पीडित परिवार नै प्रहरीमाथि झुठो प्रमाणको आरोप लगाएपछि घटनामा नयाँ मोड आएको छ ।

पीडित परिवारले जारी गरेको विज्ञप्तिमा पचरौता नगरपालिकामा केहि दिन पहिला घटेको घटनामा संलग्न व्यक्तिहरुको नाम तथा मोटरसाईकललाई यो घटनासंग जोडी सत्यलाई ढाकछोप गरि घटनालाई अन्यत्र मोड्न खोजेको आरोप लगाएको हो ।

दिनदहाडै भएको हत्याबाट सृजित हुन सक्ने अवस्था तथा सुरक्षा चुनौतीलाई थेग्न नसम्ने अवस्थाबाट मुक्ती पाउन मुद्दालाई अन्यत्र मोड्ने प्रयास भएको आरोप पनि लगाईएको हो ।

यसका साथै, पीडित परिवारको तर्फबाट सुमोद कुमार सर्राफद्धारा हस्ताक्षरित प्रेस विज्ञिप्तिमा विना प्रमाण मृतकको चरित्र हत्या गरेको, लासको खेल गरे सबैकुरा सार्वजनिक गर्छु भनेर दाह संस्कार गर्ने दबाब दिएको तर जिल्ला प्रहरी कार्यालयद्वारा गरिएको पत्रकार सम्मेलनमा चित बुझ्दो प्रमाण दिन नसकेको आरोप लगाएको हो ।

मृतकलाई अस्पताल पुन्याउने विद्यालयका कर्मचारी रियाज अंसारी तथा घट्ना स्थलमा हुँदै नभएका विद्यालयकै अर्को कर्मचारी जमिल अख्तर अंसारीलाई बिना प्रमाण सहयोगीको आरोप लगाईं फसाउन खोजेको, शान्ति सुरक्षा कायम गर्न नसकेको प्रश्न प्रहरी प्रशासनमाथि उब्जने बाटोबाट बच्न आम जनताका आँखामा भ्रम सृजना गर्न खोजेको, प्रमुख जिल्ला अधिकारी र जिल्ला प्रहरी कार्यालयको अभिव्यक्तिमा भिन्नता देखिएको उल्लेख छ ।

जिल्ला प्रहरी कार्यालय दोषीहरुको दोषलाई उजागार गर्ने नसकेको, दोषी नउम्कुन र निर्दोष कोहि नफसोस भन्नै आसाका साथ सत्यतथ्य प्रमाण सहित घटनाको विवरण सार्वजनिक गर्ने घटनालाई अन्यत्र नमोड्न प्रशासन समक्ष अनुरोध समेत गरेको हो ।

पीडित परिवारको तर्फबाट प्रहरी प्रशासनको अनुसन्धानप्रति प्रश्न खडा भएपनि अनेकौँ मोडहरु आएको छ । बारा प्रहरीले बुधबार नै राधा गुप्तासहित पाँच जनालाई सार्वजनिक गरेको हो । घटनामा ८ जनाको सँलग्नताको सँकेत प्रहरीले दिएको हो ।