जनकपुरमा पहिलो पटक भव्य  'झिझिया नाच' हुँदै, एकै पटक ५०० बढी युवायुवतिहरुले नृत्य गर्ने

न्यूज ब्यूरो, जनकपुरधाम । धार्मिक नगरी भनेर चिनिएको जनकपुरधामा पहिलो पटक भव्य झिझिया नृत्य कार्यक्रम हुने भएको छ । आउँदो कार्तिक ३ गते शुक्रबार भव्य झिझिया नृत्य कार्यक्रम हुने भएको छ ।

जनकपुरधाम उपमहानगरपालिका वडा नं. १ रेल्वे स्टेशनस्थित (प्राँगन) मा भव्य झिझिया नाच प्रोगाम हुने भएको आयोजकले जनाएको छ । मिथिला मधेशको पुरानो सँस्कृतिलाई नयाँ र भव्य तरिकाले दर्साउनको लागि ५०० बढी नृत्यकर्मीहरुले एक साथ नृत्य प्रदर्शन गर्ने भएको छ ।

दशैँ चढे लगत्तै तराई मधेशको जिल्लाहरुमा झिझिया नाच गर्ने गरिन्छ । खास गरी जनकपुर र आसपासको क्षेत्रमा ग्रामिण भेकमा समेत झिझिया नाच गर्ने परम्परा सँस्कृति रहिआएकोमा जनकपुरमा यसपाली भव्य झिझिया नाच कार्यक्रम गर्न लागिएको हो ।

समाजिक सँस्था नव मिथिला फाउण्डेशनको आयोजनामा जनकपुरको रेल्वे स्टेशनस्थित साँझ ५ बजेदेखि नै सुरु हुने सो झिझिया नाच प्रोग्राममा युवकहरुले समेत झिझिया नाचमा सहभागीता जनाउने भएको आयोजक समितिका अमित साहले जानकारी दिए ।

साहका अनुसार, जनकपुर र यस क्षेत्रमै पहिलो पटक ५०० बढी युवायुवतिहरुले एक साथ झिझिया नृत्य र गायन गर्ने कार्यक्रमको आयोजना गरिएको हो । कार्यक्रम राती ९ बजेसम्म मात्र हुने साहले बताए ।

दशैँको बेला झिझियाको आफ्नै महत्व र पारम्पारिक रस रहेको छ । जनकपुरधाममा पहिलो पटक भव्य तरिकाले सामुहिक झिझिया नृत्य कार्यक्रम हुने भएपछि हजारौँको सँख्यामा दर्शकहरु ओर्लने विश्वास आयोजकले लिएको हो ।