उग्रवादी हमासको आक्रमण निन्दनीय, आनन्दको परिवारलाई मधेश सरकारले ५ लाख राहत दिनेछः मुख्यमन्त्री यादव

न्यूज ब्यूरो, जनकपुरधाम । इजरायलमा भएको आतंकी हमलामा परी ज्यान गुमाएका धनुषाका आनन्द साहको परिवारलाई मधेश प्रदेश सरकारले पाँच लाख रुपैयाँ राहत स्वरुप उपलब्ध गराउने भएको छ ।

मधेश प्रदेशका मुख्यमन्त्री सरोजकुमार यादवले मँगलबार एक सूचना जारी गर्दै आनन्दको परिवारलाई प्रदेश सरकारको तर्फबाट रु. ५ लाख उपलब्ध गराउने जनाएको हो ।

मुख्यमन्त्री यादवले हमासको आक्रमणलाई उग्रवादीको सँज्ञा दिँदै अमानवीय र निन्दनीय बताएका छन् । उनले लर्न एण्ड अर्नमा गएका धनुषाको लक्ष्मीनियाँ गाउँपालिका वडा नं. ४ सपहीका २२ बर्षिय युवक आनन्द साहले अनाहकमा ज्यान गुमाउनुपरेको भन्दै हमासलाई उग्रवादी बताएका छन् ।

उनले शोकाकुल परिवारप्रति संवेदना प्रकट गर्दै मधेश सरकारको तर्फबाट राहत स्वरुप सो रकम उपलब्ध गराउने प्रतिवद्धता जाहेर गरेका हुन् ।