सिरहाः समुदायिक वनबाट काठ चोरी गरी बेच्दै गर्दा ट्रयाक्टरसहित चालक पक्राउ, चोर फरार

न्यूज ब्यूरो, सिरहा । सिरहाको एक समुदायिक वनबाट काठ चोरी गरी बेच्दै गर्दा ट्रयाक्टरसहित चालक पक्राउ परेका छन् ।

सिरहाको कर्जन्हा नगरपालिका वडा नं. २ र ३ मा रहेको श्री कमला देवी समुदायिक वनबाट मूल्यवान काठ चोरी गरी धनुषमा बेच्दै गर्दा ट्रयाक्टरसहित चालक पक्राउ परेको हो ।

समुदायिक वनबाट काठ चोरी गरी धनुषाको गणेशमान चारनाथ नगरपालिका वडा नं. ७ गोदारस्थित रहेको महेश सःमिलमा बेच्दै गर्दा पक्राउ परेको हो ।

विगत केही दिनदेखि समुदायिक वनमा गस्ती बढाउन थालेपछि काठ चोर र तस्करहरु धमाधम पक्राउ पर्न लागेको वनका अध्यक्ष लालि यादवले बताए । यादवका अनुसार, समुदायिक वनमा स्टोर गरि राखिएको काठ केही चोर, तस्करहरुले चोरेर अन्यत्रै बेच्ने गरेको खवर पाएपछि गस्ती बढाईएको बताए ।

अध्यक्ष यादवले रातीमा समेत गस्ती बढाएपछि काठ चोर पत्ता लागेको बताए । उनका अनुसार, वनबाट १० टोनी अर्थात करिब १ लाख मूल्य बराबरको काठ चोरी गरेको अवस्थामा सःमिलबाट फिर्ता ल्याईएको हो ।

सो प्रकरणमा ट्रयाक्टर धनी श्रीकिशोर यादव र चालक अनिल महरालाई तत्काल छानबिनमा राखिएको हो । काठ चोरीमा सँलग्न कर्जन्हा नगरपालिका वडा नं. २ कै विक्रम दास तत्मा फरार रहेका छन् । उनको खोजी कार्य तीव्र पारिएको अध्यक्ष यादवले जानकारी दिए ।

प्रहरीमा समेत तत्मालाई पक्राउन गर्नको लागि पत्राचार गरिएको बताउँदै उनले प्रहरीले खोजबिन जारी राखेको बताए । ्