समाजिक सँजालमा स्टेटस लेखिदिएपछि नेपालगञ्ज तनावग्रस्त

न्यूज ब्यूरो, नेपालगँज । समाजिक सँजाल फेसबुकमा एक स्टेटस लेखिदिएपछि बाँके जिल्लाको नेपालगँज अहिले तनावग्रस्त बनेको छ ।

समाजिक सँजाल फेसबुकमा एक युवकले “गाई हरायो” भनेर लेखेपछि दुई समुदायबीच तनाव उत्पन्न भएको हो । नेपालगँज बस्ने एक युवकले आफ्नो गाई हराएको र मुस्लिम समुदायलाई लक्षित गरी फेसबुकमा स्टेटस हालेपछि मुस्लिम समुदायले झण्डा लिएर नेपालगँजमा विरोध जनाएको हो ।

मुस्लिम समुदायका व्यक्तिहरु सडकमा आएपछि समाजिक सँजालमा लेख्ने युवकलाई तत्कालै पक्राउ गरी सहमति गराएको हो । व्यक्तिगत रुपमा स्टेटस लेखेपछि मुस्लिम समुदायलाई सोही स्टेटसलाई मुद्दा बनाएर सिँगो कौम (धर्म) प्रति प्रहार गरेको भन्दै आन्दोलित भएका थिए । युवकले सार्वजनिक रुपमा माफी मागेपछि अवस्था साम्य हुन थालेको जिल्ला प्रहरी कार्यालय बाँकेले जनाएको छ ।

प्रहरीका अनुसार, युवकले गाई हराएपछि व्यक्तिगत रुपमा एक जनालाई लक्षित गरी स्टेटस लेखेपछि बबाल मचेको थियो । अहिले नेपालगँजको अवस्था समान्य रहेको प्रहरीले जनाएको छ ।

यता, जिल्ला प्रशासन कार्यालय बाँकेले एक प्रेस विज्ञप्ति जारी गर्दै समाजिक सँजालमा कुनै धर्म व्यक्तिको बारेमा स्टेटस लेख्ने, जथाभावी लेख्नेलाई चेतावनी दिँदै कानुनी कारवाही गर्ने जनाएको छ ।

स्टेटस लेख्ने युवकले सार्वजनिक रुपमा माफी माग्दै स्टेटस हटाएपछि सहमति भएको हो । यद्यपी, प्रहरीले वास्तवमा त्यो युवकले के लेखेको तथा नाम ठेगाना समेत खुलाउन चाहेनन् ।