डाक्टर कुटिएपछि मणिपाल अस्पतालको सबै सेवा ठप्प

न्यूज ब्यूरो, पोखरा । पोखरास्थित रहेको मणिपाल अस्पतालमा विरामीको मृत्यूपछि डाक्टरमाथि कुटपिट हुँदा अस्पतालको सबै सेवा ठप्प पारिएको छ ।

लमजुङबाट उपचारका लागि सोमबार बिहान मणिपालमा ल्याइएकी ५७ वर्षीय महिलाको मृत्यु भएपछि आफन्तजन आक्रोशित बनेका थिए ।

विरामीको अवस्थाबारे पनि जानकारी नदिइएको र अस्पतालको लापरबाहीकै कारण महिलाको मृत्यु भएको भन्दै डा. अनिल शाहमाथि हातपात भएको प्रहरीले जनाएको छ । हातपातमा संलग्न भएको आरोपमा प्रहरीले १ जनालाई नियन्त्रणमा लिएको छ ।

अस्पतालमा ठूलो संख्यामा प्रहरी परिचालन गरी डाक्टरहरुमाथि हुने हमला रोकिएको थियो । तर, चिकित्सकहरुले भने सोमबार नै अस्पतालको सबै सेवा ठप्प पार्ने निर्णय गरिसकेको हो ।

आक्रोशित भीडले डाक्टर शाहमाथि हातपात गरेका थिए भने अस्पतालका सिसा समेत फुटाइएको छ । ड्युटीमा रहेको डाक्टरमाथि हातपात भएपछि चिकित्सक पनि आक्रोशित बनेका छन् भने आफन्तले लापरबाही गरिएको र यथार्थ घटनाको जानकारी दिन माग गरिरहेका छन् ।

पटक पटक अस्पतालमा डाक्टरमाथि आक्रमण, कुटपिट हुन थालेपछि डाक्टरलाई कुटनेमाथि फौजदारी मुद्दा लगाउने कानुन नबनेसम्म आन्दोलन जारी राख्ने जारी गरिएको विज्ञप्तिमा उल्लेख छ ।