सरकारको पक्षपातको कारण तराई–मधेश डुबानमा पर्ने गरेको छः पूर्वमन्त्री प्रभु साह

सँजय सहनी, रौतहट । आम जनता पार्टीका अध्यक्ष पुर्व मन्त्री प्रभु साहले सरकारको मधेश विरोधी व्यवहार र मधेसी जनता संग गर्ने पक्षपातको कारण तराई मधेशमा वर्षेनी डुबानको समस्या हुने गरेको बताएका छन् ।

रौतहट क्षेत्र नम्बर ३ का साँसद समेत रहेका पूर्वमन्त्री साहले बिहीबार मौलापुर नगरपालिकामा शहरी विकास मन्त्रालयद्वारा २७ करोड ५६ लाख रुपैयामा निर्माण भएको सहिद स्मृति बहुद्देश्यीय भवनको उदघाटन गर्दै सो कुरा बताएका हुन् ।

सभाको सम्बोधन गर्दै पूर्वमन्त्री साहले पहाडमा हुने वर्षाको कारण तराई मधेश डुबानमा पर्ने गरेकोले पहाडका मानिस र सरकारले तराई मधेस डुबानको समस्या बारेमा गम्भीर चिन्तन मनन गर्नु पर्ने बिचार व्यक्त गरे। ।

ठुलठुला हाइड्रोपावरमा मधेसको ब्यक्तिलाई शेयर बस्न नदिने ,बन जंगलमा पहुँचको बाताबरण रोक्ने सरकारले मधेशलाई बाढि बाट जोगाउन दीर्घकालिन कुनै ठोस कदम नचालेकोले हरेक वर्ष तराई मधेशमा बाढीको कारण जनधनको क्षति हुने गरेको, बालीनाली नोक्सान हुने गरेको तथा मच्छरको समस्या बढ्ने गरेको बताउँदै साहले सरकारको मधेश विरोधी व्यवहारका कारण मधेशमा डुबान लगायतका समस्या निरन्तर बढिरहेकोमा नेता साहले चिन्ता व्यक्त गरे।

सहिद स्मृति बहुद्देश्यीय भवन

देशमा बढिरहेको आर्थिक समस्याप्रति सरकार नै दोषी रहेको आरोप लगाउँदै नेता साहले सरकारले बेरोजगारी बढाएर बेरोजगारीको बेपार गरेको आरोप पनि लगाएका छन् । यसै गरी नेता साहले राजनीतिक व्यवस्था र अस्थिरताको कारण नै देशको आर्थिक अवस्था चिन्ताग्रस्त बनेको बताएका छन् ।

सरकारको गलत नीतिको कारण गाउँमा आर्थिक कारोबार बन्द भएको उल्लेख गर्दै नेता साहले सरकारले सर्वसाधारणलाई बैंकमार्फत ऋण नदिएको तथा गाउँको ऋण लेनदेन पनि प्रभावित भएको बताएका छन् ।

मौलापुर नगरपालिकाकी मेयर सम्बोधन गर्दै

देशको यस्तै अवस्था रहिरहे जनता चुप लागेर नबस्ने सम्भावना रहेको उल्लेख गर्दै नेता साहले समस्यामा परेकाहरु समाधानको लागि चुप लागेर नबस्ने बरु विद्रोह गर्ने चेतावनी पनि दिएका छन् ।

नवउदघाटित बहुद्देश्यीय भवनमा भविष्यमा शिक्षण अस्पताल संचालन हुने पनि साहले स्पष्ट पारेका छन् । कार्यक्रमको बिशिस्ट अतिथि पुर्व प्रदेश सान्सद कुन्दन कुशवाहाले सरकार भिजन अनुसार नचल्दा देश र जनता ऋणमा डुबेको र देश मै ब्यापार ब्यावसाय चौपट भएको बताए।नेता कुशवाहाले जनता अब पनि चुप लागे सम्पूर्णको भबिस्य चौपट हुने खतरा रहेको बताए ।

अर्का बिशिस्ट अतिथि एवं आम जनता पार्टीको केन्द्रिय महासचिव उपेन्द्र साहले रौतहटको १८ स्थानीय तह मध्ये सबैभन्दा बिकसित नगरपालिका मौलापुर भएको दाबी गरेका छन् ।

महासचिव साहले एउटा महिला मेयर भएर पनि नगरको विभिन्न क्षेत्रमा भएको बिकासको देखेर आफु दङ्ग परेको बताए ।

साहले मौलापुरको सिको अन्य स्थानीय तहले गर्नु पर्ने र यस्ता सकारात्मक पाईलाबाट रौतहटको बिकासमा टेवा पुग्ने बिश्वास ब्यक्त गरेका थिए।
मौलापुर नगरपालिकाले किनेको जमिनमा सरकारको लगानीमा बहुद्देश्यीय भवन निर्माण भएको नगर प्रमुख रिनाकुमारी साहले जानकारी गराएकी छन् ।

तेह्र कठा जग्गामा बनेको बहुउद्देशिय भवनमा चार ओटा भर्र्याङ् ,एकाउन्न ओटा शौचालय ,अट्याच कोठा संख्या चौबीस र कम्तिमा सात सय जना अटाउने एक ओटा ठुलो सभा हल रहेको मेयर रिना साहले स्पष्ट परिन् ।

प्रमुख प्रशासकिय अधिकृत राम बाबु साहले यस्तो बिशाल बहुउद्देश्यीय भवन मधेस प्रदेश मै पहिलो चोटि मौलापुर नगरपालिकाले निर्माण गर्न सफल भएको दाबि गरेका थिए।

कार्यक्रममा पुर्व संघीय सांसद समिना हुसैन , पुर्व मेयर सियाराम कुशवाहा लगायत दर्जनौं नेता एवं जनप्रतिनिधि तथा हजारौंको बाक्लो उपस्थिति रहेको थियो ।