न्यूज ब्यूरोको प्रभावः जलेको ट्रान्सफर्मर हटाएर आज नयाँ ट्रान्सफर्मर जडान गरिदैँ

न्यूज ब्यूरो, जनकपुरधाम । विगत ४ दिनदेखि अँध्यारोमय जीवन बिताएका सुखिपुर नगरपालिका वडा नं. ३ कुशहा लक्ष्मीनियाँमा आज नयाँ विद्युतिय ट्रान्सफर्मर जडान गर्न लागिएको छ ।

सिरहाको सुखिपुर नगरपालिका वडा नं. ३ को कुशहा लक्ष्मीनियाँमा विगत तीनदिनदेखि ट्रान्सफर्मर जल्दा अन्धकार भएका सिँगो टोल र किसानहरु पीडित भएपछि न्यूज ब्यूरोले शिर्षकको समाचार प्रकाशित गरेको थियो । शुक्रबार समाचार प्रकाशित भएपछि शनिबार बिहानै नेपाल विद्युत प्राधिकरण लहान शाखाले ट्रान्सफर्मर जडान गर्न गाउँ पुगेको हो ।

किसानहरुले खेतमा मोटर सिँचाई थालेपछि लोड थाम्न नसकेर सुखियपुर नगरपालिका वडा नं. ३ कुशहा लक्ष्मीनियाँको ट्रान्सफर्मर जलेपछि त्यहाँका बासिन्दा विगत तिनदिन देखि अन्धकारमा जिउन बाध्य भएका थिए ।

आकाशे पानी नहुँदा बोरिँगबाटै सिँचाईको विकल्प भएको त्यहाँका किसानहरु अधिक समस्यामा परेका थिए । बिजुली नहुँदा उनीहरुले सिचाईको अभावमा खेतपाती समेत गर्न धौधौँ भएपछि वडा नं. ३ का वडाध्यक्ष हरेराम यादव, कानुनका विद्यार्थी गुमस्ता कुमार यादव, मदन सेन श्रीवास्तब, बिशो प्रसाद यादव, रामकुमार यादव, शिव दयाल महतो, बिरेन्द्र सरलगायत सो टोलका स्थानीय बुद्धिजीवीहरुले घचघचाका थिए ।

यसको लागि सुखिपुर नगरपालिका वडा नं. ३ बाट वडाध्यक्ष हरेराम यादवले समेत लहान ग्रीडलाई पत्राचार गर्दै यथाशिघ्र ट्रान्सफर्मर जडान गरिदिन आग्रह गरेपनि विद्युत फ्यूज शाखा लहानले खासै चासो नदेखाएपछि न्यूज ब्यूरोलाई गुहारेका थिए । वडा कार्यालयले दर्ता गराएको पत्रमा ईन्जिनीयरलाई सम्बोधन गरी तोक लगाएपनि ईन्जिनीयरले ट्रान्सफर्मरको लागि कुनै चासो नलिएपछि न्यूज ब्यूरोले समाचार प्रकाशित गरेको थियो ।

विद्युत प्राधिकरणको लहान शाखालाई लक्षित गरी न्यूज ब्यूरोमा शुक्रबार समाचार प्रकाशित भएपछि शनिबार बिहानै नयाँ ट्रान्सफर्मर जडानको लागि कर्मचारी पठाएर जडान कार्य गरिरहेको छ । नयाँ विद्युतिय ट्रान्सफर्मर लगाउन थालेपछि सो टोलवासीमा खुसीको माहौल छाएको छ ।

पहिलो समाचार पढनुहोस्