न्यूज ब्यूरोको प्रभावः जानकी फूलबारीमा सिडिओको एक्सन, तरकारी हटाएर पौराणिक फूलबारी बनाइने

न्यूज ब्यूरो, जनकपुरधाम । जानकी मन्दिर परिसरभित्र रहेको जानकी फूलबारीमा पौराणिक फूलबारी बनाइने भएको छ । धनुषाका प्रमुख जिल्ला अधिकारी (सिडिओ) काशिराज दाहालले फूलबारीमा एक्सन लिँदै पौराणिक फूलबारी बनाउने उदघोष गरेका छन् ।

धनुषा आएलगत्तै जनकपुरधाम सरसफाईमा जुटेका सिडिओ दाहालले ऐतिहासिक जानकी फूलबारीमा जानकी मन्दिरका महन्थ राम तपेश्वर दासले तरकारी बारी लगाएपछि न्यूज ब्यूरोले समाचार प्रकाशित गरेको थियो । न्यूज ब्यूरोमा जानकीको मर्यादासँग महन्थको खेलवाड, जानकी फूलबारीमा तरकारी उब्जाउँदै महन्थ शिर्षकको समाचार प्रकाशित भएपछि सिडिओ दाहालले एक्सन लिएका हुन् ।

न्यूज ब्यूरोमा समाचार प्रकाशितको साथै स्थानीय नागरिक समाजले समेत समाजिक सँजाल मार्फत नै चर्को विरोध जनाएपछि सिडिओ काशिराज दाहालले यथास्थानमै पुगेर जनकपुरवासीलाई घर घरबाट एक एक फूल लिएर जानकी फूलबारीको पुरानो ईतिहास फर्काउन आग्रह गरे ।

सिडिओ दाहालले आगामी शुक्रबार आ–आफ्नो घरबाट कुनै पनि फूलको एक एक बोट लिएर रोपिदिन आग्रह समेत गरेका छन् । धार्मिक एवं सांस्कृतिक फूलबारीलाई सौन्दर्यीकरण एवं संरक्षण गर्न विभिन्न सरकारी एवं गैरसरकारी संघ, संस्था एवं समुहहरुलाई आग्रह गरे ।

सो क्रममा जनकपुरधामका मेयर मनोज साह, नागरिक समाजका अगुवा मुरली मनोहर मिश्र, पर्यावरण अभियानी, धार्मिक आस्थाका अभियानी लगायत प्रशासनीक निकायका व्यक्तित्वहरु उपस्थिति जनाएका थिए ।