नेपाल–भारत बोर्डरमा महिलामाथि गोली प्रहार गरी हत्या

न्यूज ब्यूरो, जनकपुरधाम । नेपाल–भारतको सीमा क्षेत्रमा एक महिलामाथि गोली प्रहार गरी हत्या गरिएको छ । दुवै देशको खुल्ला सीमा क्षेत्र पर्ने धनुषाको मुखियापट्टि मुसहरनिया गाउँपालिका वडा नं. २ स्थित सो घटना भएको हो ।

दुई देशबीचको दशगजा क्षेत्रमै महिलामाथि गोली प्रहार गरी हत्या गरिएको जनाइएको छ । जिल्ला प्रहरी कार्यालय धनुषाका अनुसार, महिलाको पहिचान अझै खुलेको छैनन् ।

मोटरसाइकलमा सवार दुईजना अज्ञात व्यक्तिले अन्दाजी ३५ वर्षीया महिलालाई गएराति ८ः२० बजे दुई राउन्ड गोली प्रहार गरी भारततर्फ नै भागेको स्थानीय प्रत्यक्षदर्शीहरुलाई उद्धृत गर्दै धनुषा प्रहरीले जनाएको छ ।

सीमा क्षेत्र अनुसार, भारतीय भूमिमा घटना भएकाले भारतीय प्रहरीले लास पोस्टमार्टमका लागि लगेको धनुषाका प्रहरी प्रवक्ता डिएसपी वेदप्रसाद गौतमले बताए ।

नेपाल प्रहरी र भारतीय प्रहरीले समन्वय गरी घटनाको अनुसन्धान गरिरहेको डिएसपी गौतमले बताए । उनका अनुसार दशगजा क्षेत्रमा प्रहार भएका गोलीका खोका भेटिएका छन् ।