जनकपुरः विरामी परी मरेर गाडिएको खसीको मासु बेच्ने पक्राउ

न्यूज ब्यूरो, जनकपुरधाम । विरामी भई मरेको खँसी उखेलेर बजारमा मासु बेच्ने एक जना पक्राउ परेका छन् । यो घटना गत साताको हो ।

धनुषा जिल्लाको शहिदनगर नगरपालिका वडा नं. ३ यदुकूहा बजारस्थित माछामासु बजारमा विरामी भई मरेर गाडिएको खँसी उखेलेर मासु बेचेको आरोपमा एक पुरुष पक्राउ परेका छन् ।

गत साता यो घटना बताईएको छ । विदेह नगरपालिका वडा नं. ६ बस्ने अशेश्वर पासवानले सोही ठाउँ बस्ने स्थानीय खुसिलाल महराको खँसी रोग लागेर मरेपछि गाउँभन्दा पर बगैँचामा गाडिएको थियो । विरामी भई मरेका सो खँसीलाई जमिनमुनिबाट उखेलेर यदुकूहा बजारमा मासु बेचेको पासवानलाई प्रहरीले जानकारी पाएपछि पक्राउ गरेको हो ।

खँसी मरेको करिब ४ घण्टापछि पासवानले सो खँसीलाई जमिनमुनीबाट उखेलेर मासु बनाएका थिए । सोही मासु यदुकूहा बजारमा उनले बेचेको जिल्ला प्रहरी कार्यालय धनुषाले जनाएको छ । उनले यदुकूहा बजारसहित तिनकोरियाको केही माछामासु पसलमा समेत बेचेका थिए । रोगी खँसीको मासु बेचेर उनले मान्छेको ज्यानसँग खेलवाड गरेको भन्दै पासवानमाथि मुद्दा चलाईएको छ ।

मरेको खँसीको मासु बेचेको तथ्य बाहिर आएपछि केही ग्राहकहरुले प्रहरीमा उजुरी गरेको थियो । जानकारी पाएपछि प्रहरी उनलाई पक्राउ गरी जिल्ला पठाएको थियो । अहिले पासवान हिरासतमा रहेका छन् ।