कमला नगरपालिकामा लम्पी स्कीन रोगले दर्जनौ पशु मर्दै, एक बर्षदेखि छैनन पशु चिकित्सक

न्यूज ब्यूरो, जनकपुरधाम । नेपाल सरकारको पशु सेवा विभागले पशुमा देखिने लम्पीस्कीन रोगको उपचार गर्न सबै स्थानीय तहलाई आग्रह गरिएको भएपनि कमला नगरपालिकामा अझै पशु चिकित्सक नहुँदा दर्जनौ पशु पर्दै गएको छ ।

संक्रमण फैलिँदै गएकाले विभागले यथाशिघ्र औषधि उपचार तथा खोप खरिद गर्न आग्रह गरेको एक साता भएपनि कमला नगरपालिकाले सोप्रति ध्यान दिन सकेका छैनन् ।

असार सकिएपछि कर्मचारीहरु आफ्नो धुनमा लागेका छन् भने जनप्रतिनीधिहरु बजेटको कसरतमा लागेको देखिएको छ । कमला नगरपालिकाभित्र अहिलेसम्म डेढ दर्जन बढी पशुहरु लम्पी स्कीन रोगको कारण ज्यान गुमाएको छ ।

लम्पीस्कीन रोग फैलिने गएकोले स्थानीय तहलाई उपचार गर्न आग्रह गर्दै विभागले महामारी नियन्त्रण गर्नका लागि फैलिएका स्थानीय तहमा रु एक लाख अनुदान उपलब्ध गराएको छ। यद्यपी, कमला नगरपालिकामा पशु चिकित्सक नै नहुँदा स्थानीय सरकारको स्तरबाट कुनै सहयोग जनताले पाउन सकेको छैनन् ।

विभागले महामारी रोकथाम र नियन्त्रण गर्न प्रदेश र स्थानीय तहमा सम्पर्क व्यक्ति तोकेको उनले जानकारी दिए। विभागले लम्पीस्कीन रोग नियन्त्रण कक्ष स्थापनासहित प्रभावित क्षेत्रमा रोग अन्वेषण, उपचार र प्राविधिक सल्लाहका लागि टोली परिचालन गरेको छ। २०७९ चैतदेखि फैलिएको लम्पीस्कीन संक्रमणबाट २६ हजार बढी पशु चौपाया मरेका छन् ।

पशुमा महामारीको रुपमा फैलिएको लम्पीस्कीन रोग नियन्त्रणका लागि विभाग र मातहतका निकाय, प्रदेश सरकार मातहतका निकाय तथा स्थानीय तहमा कार्यरत पशु स्वास्थ्यकर्मी परिचालन गरिएको छ।

लम्पी स्कीन गाईभैँसीमा भाइरसको कारणले लाग्ने महामारी रोग हो। यो रोग लागेमा पशुमा उच्च ज्वरो आउने, दाना पानी कम खाने, दूध उत्पादन घट्ने, छालामा गोला गिर्खा तथा गाँठाहरु देखिने, र्याल सिँगान वग्ने, चिप्रा–कचेरा लाग्ने, खुट्टा÷जोर्नी सुन्निनेजस्ता लक्षण देखा पर्दछन्। यस रोग बाच्छाबाच्छी, जोत्ने गोरु, उन्नत जातका बढी दूध दिने दूधालु र गर्भिणी गाईभैँसीलाई असर गर्ने गर्दछ।

लम्पी स्कीन नेपालमा पहिलो पटक २०७७ असारमा मोरङ जिल्लाको सुन्दरहरैंचा नगरपालिकामा देखिएको थियो। रोग देखिएको दुई वर्षमा १६ जिल्लाका २९ पालिकामा रोग फैलिदा तीन हजार तीन सय एक पशु संक्रमित भई १३ पशु परेका थिए। अहिले देखिएको संक्रमणबाट कर्णाली, सुदूरपश्चिम, लुम्बिनी र कोशी प्रदेशकामध्ये पहाडी तथा पहाडी क्षेत्रमा रहेका पशु बढी प्रभावित भएका छन्।

विभागले संक्रमण नियन्त्रणका लागि अहिले प्रदेश र स्थानीय तहमा सम्पर्क व्यक्ति तोकेको छ। रोग नियन्त्रण गर्नका लागि एक सय ६१ स्थानीय तहमा भेटेरिनरी डाक्टर र सबै स्थानीय तहमा प्राविधिकको व्यवस्थापन आगामी आर्थिक वर्षको बजेटबाट गरिएको छ।

कमला नगरपालिकामा विगत १ बर्षदेखि पशु चिकित्सक नै नहुँदा नगरवासीहरुले सरकारी सेवा सुविधा पाउनबाट बँचित भएको छ । नगरभरी लम्पी स्कीनको सँक्रमण फैलिएको छ । दिनहुँ पशुचौपायाहरु मरिरहेको देखिएको छ ।