जनकपुरको राराब क्याम्पस वरिपरि सूर्तिजन्य पदार्थ बेच्न प्रतिबन्धः सिडिओ दाहाल

न्यूज ब्यूरो, जनकपुरधाम । धनुषाका प्रमुख जिल्ला अधिकारी (सिडिओ) काशिराज दाहालले राराब क्याम्पसको वरिपरि सूर्तिजन्य पदार्थ विक्रिी वितरणमा रोक लगाएको बताएका छन् ।

सरकारको कानुन अनुसार विद्यालय क्षेत्रको २०० मिटर वरिपरि सूर्तिजन्य पदार्थ, रक्सी, लागू पदार्थहरु विक्री वितरण गर्न पाउँदैन, सोही कानुन कार्यन्वयनको लागि विहिबार सिडिओ दाहालले आफैँ पुगेर अनुमगन गरेका छन् ।

राराब क्याम्पसको २०० मिटर वरिपरिको पसलहरुमा सूर्तिजन्य पदार्थ विक्री वितरण गर्न उनले रोक लगाएका हुन् । विहिबार जनकपुरधाम उपमहानगरपालिकाका नगर प्रमुख मनोज साह र राराब क्याम्पसका स्ववियू अध्यक्ष मनिष यादवसँगको सहकार्यमा कलेज आसपास क्षेत्रमा सूर्तिजन्य पदार्थ विक्री वितरण गर्न रोक लगाएको हो ।

यसका साथै, जनकपुरधामको मठ मन्दिर, सरकारी कार्यालयहरुको २०० मिटर आसपास क्षेत्रमा समेत यस्ता पदार्थहरु विक्री वितरण गर्न रोक लगाउने गरी जनचेतना कार्यक्रम गरेको बताए । उनले एकै पटक यस्ता कार्यहरु रोकिने सम्भावना न्यून रहेको भन्दै चेतना मार्फत प्रभावकारी बनाउने बताए ।

उनले भने, “सुरुको फेजमा हामीले सरकारी कार्यालय, विद्यालय, मठ मन्दिरको २०० मिटर आसपासमा सूर्तिजन्य, मदिरा विक्री वितरण नगर्न चेतना फैलाउने कार्य सुरु गरेका छौँ , नियम कानुन पालनाको लागि सीधा चाप नदिई विस्तारै चेतनामार्फत निर्मूल पार्ने कार्य अगाडी बढाएका छौँ । यसको लागि यहाँका जनप्रतिनीधि र प्रहरीसँग सहकार्य गरिएको छ ।”

सुरुमा चेतावनी दिने गरी कार्य बढाउने भन्दै अटेरी गरेको खण्डमा कानुन बमोजिम नै प्रहरी लगाएर कार्यन्वय गर्न बाध्य हुने बताए ।