नागरिकता आन्दोलनका योद्धा ईन्द्रजीत साफीले जनकपुरबाट नागरिकता पाएपछिको खुसी...

न्यूज ब्यूरो, जनकपुरधाम । बर्षौदेखि नागरिताविहिन भएर बाँच्नुपर्दाको पीडा बोकेर नागरिकता आन्दोलन चर्काएका सो आन्दोलनका योद्धा ईन्द्रजीत साफीले अन्ततः नागरिकता प्राप्त गरेका छन् ।

जिल्ला प्रशासन कार्यालय धनुषा (जनकपुर) बाट उनले आईतबार बंशजको नागरिकता पाउन सफल भएका छन् । काठमान्डौँको माईतीघरसहित अन्य स्थानमा भएको नागरिकता सम्बन्धी आन्दोलनमा अगुवाई गरेका साफीले नागरिकता पाएपछि खुसीले भावुक बने ।

आईतबार दिउँसो उनलाई धनुषाका प्रमुख जिल्ला अधिकारी काशिराज दाहालले नागरिकता दिएका हुन् । उनले सबै कानुनी प्रक्रिया पुरयाएर नागरिकता लिएका हुन् ।

आमासँगै नागरिकता बनाउन जिल्ला प्रशासन कार्यालय धनुषा पुगेका साफीले यतिको दिनदेखि गरिरहेको आन्दोलनको प्रतिफल पाएपछि केही बेर भावुक बने । उनी ईन्जिनीयर पढेर नागरिकता अभावमा जागिर गर्नबाट बँचित हुनुको साथै अन्य सेवा सुविधाबाट समेत बँचित हुँदै आएका थिए । आफ्नै देशमा अनागरिक भएर बस्दै आएका साफी जस्ता हजारौँ युवाले नागरिकता पाउने बाटो खुलेको हो ।

विहिबार सर्वोच्च अदालतले नागरिकता विद्येयक पारितमा परेको रिटलाई निरन्तरता नदिने भनेपछि जन्मको आधारमा पाउने नागरिकताको बाटो खुलेको हो । जन्मसिद्ध नागरिकले वंशजको आधारमा नागरिकता प्राप्त गर्न थालेका छन् ।

नागरिकता विद्येयक र आन्दोलनमा अगुवाई गरेका साफीले नागरिकता पाएपछि समाजिक सँजाल मार्फत उनलाई हजारौँ शुभचिन्तकहरुले बधाई दिएका छन् ।