विश्व विख्यात वरिष्ठ आँखा रोग विशेषज्ञ डा. सन्दुक रुइत जनकपुरमा सम्मानित

न्यूज ब्यूरो, जनकपुरधाम । विश्व विख्यात नेपालका वरिष्ठ नेत्र रोग विशेषज्ञ एवं आँखा सर्जन प्राध्यापक डा. सन्दुक रुइतलाई जनकपुरधाममा शनिबार आधा दर्जन सरकारी एवं सामाजिक संघ संस्थाहरूले सम्मान गरेका छन् ।

जानकी आँखा अस्पताल व्यवस्थापन समितिका अध्यक्ष रामनरेश सिंहसहितकाले डा।रुइतलाई जानकी मन्दिरको प्रतीमासहितको मायाको चिनो र सम्मानित पत्र प्रदान गरेका थिए । खास गरी आँखा उपचारको क्षेत्रमा डा। रुइतले गरेको मेहनत र क्रियाशीलताले सिंगो देशकै गौरव बढाएको भन्दै उनलाई सम्मान गरिएको छ ।

कार्यक्रमका वक्ताहरुले स्वदेश तथा विदेशमा रहेका बिरामीलाई उपचार गरेर सामाजिक सेवामा डा. रुइतले देखाएको कर्मबाट सबैले प्रेरणा लिनुपर्ने बताए । कार्यक्रममा मधेश प्रदेशका प्रदेश प्रमुख हरिशंकर मिश्रले अन्धकारमा छटपटिएका बिरामीलाई ज्योति प्रदान गरेका डा. रुइतले मुलुकलाई अन्तर्राष्ट्रिय तहमा परिचित गराएकोले उनलाई जति सम्मान गरेपनि कम हुने बताए ।

अस्पतालका अध्यक्ष रामनरेश सिंहले आँखा अस्पतालको विकासको लागि डा. रुइतले गरेको अविष्मरणीय योगदानको प्रशंसा शब्दमा अटाउन नसकिने बताए ।

उनले आँखा उपचारको क्षेत्रमा मात्र नभइ सामाजिक विकास तथा मानवीय सेवाको भावना डा. रुइतमा अतुलनीय रहेको जिकिर गरे । डा. रुइतले नेपालमा पहिलो पटक आँखा उपचारमा लेन्सको प्रयोगलगायतको नयाँ प्रविधिमा आमूल परिवर्तनकारी भूमिका निर्वाह गरेको बताउँदै अध्यक्ष सिंहले उनको योगदानको तुलना गर्नै नसकिने बताए ।