नागरिकता ऐन कार्यान्वयनको बाटो खुलेपछि माइतीघरमा खुशियाली

न्यूज ब्यूरो, काठमाडौं । राष्ट्रपति रामचन्द्र पौडेलले प्रमाणीकरण गरेको नयाँ नागरिकता ऐन कार्यान्वयन हुने भएपछि नागरिकता पीडितले खुसीयाली मनाएका छन् ।

सर्वोच्च अदालतले बिहीबार उक्त विधेयक कार्यान्वयनका लागि बाटो खुला गरिदिएपछि नागरिकता पीडित संघर्ष समितिले खुशियाली मनाएको हो ।

सर्वोच्च अदालतले नागरिकता ऐनको संशोधित व्यवस्था कार्यान्वयन नगर्न यसअघि जारी गरेको अल्पकालीन अन्तरिम आदेशलाई निरन्तरता नदिएपछि विधेयक कार्यान्वयनका लागि बाटो खुलेसंगै नागरिकताविहीन युवाहरूले अबिर दलेर खुशियाली मनाएका हुन् ।

नेपाली नागरिकलाई नागरिकताविहीन बनाएको भन्दै उनीहरूले लामो समय देखि माइतिघरमा विरोध प्रदर्शन गर्दै आन्दोलन गरिरहेका थिए । सर्वोच्चको आदेशसँगै उनीहरूले आन्दोलनका सम्पूर्ण कार्यक्रम स्थगित गरेका छन् । नागरिकताविहीन संघर्ष समितिका अध्यक्ष इन्द्रजित साफीले सर्वोच्चको आदेश लाखौ नागरिकता विहीन युवाहरूको जीवन बचाउनका लागि महत्वपूर्ण कदम भएको बताए । उनले ढिला भएपनि अदालतबाट न्याय पाएको र आशाको ज्योति जगाएको जिकिर गरेका छन् ।

नागरिकता बिहिनहरुको लागि न्याय माग्दै ७ दिनदेखि आमरण अनशनमा बसेका नेता राम कुमार शर्माले नागरिकता ऐन कार्यान्वयन हुने भएपछि आफ्नो अनशन तोडेको थियो ।

सर्वोच्चको आदेशपछि जन्मसिद्ध नागरिकका सन्तानले माइतीघर केन्द्रित आन्दोलन गर्दै आएका थिए । तर, बिहिबार न्यायाधीश डा.आनन्दमोहन भट्टराई र कुमार रेग्मीको इजलासले उक्त अल्पकालीन अन्तरिम आदेशलाई निरन्तरता नदिने आदेशको उनीहरूले स्वागत गरेका छन् ।

राष्ट्रपतिले प्रमाणीकरण गरेको विधेयकमा जन्मका आधारमा नागरिकता लिएका नेपालीको सन्तानलाई वंशजको नागरिकता दिने व्यवस्था छ । तर उक्त विधेयक प्रमाणीकरणविरुद्ध परेको रिटमा सुनुवाइ गर्दै सर्वोच्च अदालतले २२ जेठमा विधेयक कार्यान्वयनका लागि अल्पकालीन अन्तरिम आदेश दिएको थियो ।