जातीय धोंस देखाउँदै यादव परिवार पटक-पटक कुटछ: पीडित युवक

न्यूज ब्यूरो, जनकपुरधाम । धनुषामा जातीय दम्भ देखाउँदै जातकै आधारमा कुटपिट गरेको घटना बाहिरिएको छ । धनुषाको रमदैयास्थित एक युवकलाई जातको आधारमा कुटपिट गरेको आरोप लगाईएको छ ।

धनुषा जिल्लाको क्षीरेश्वरनाथ नगरपालिका वडा नं. २ रमदैयास्थित बस्ने मनोज कुमार मण्डललाई जातको आधारमा पटक पटक कुटपिट गरेको आरोप लगाईएको छ ।

यादव समुदायको बाहुल्यता रहेको रमदैयामा मण्डलले आफूलाई पटक पटक स्थानीय राजकिशोर यादवका छोरा आनन्द यादवले कुटपिट गर्ने गरेको आरोप लगाएका छन् । उनलाई टाउको फुटाउनको साथै कानको जाली समेत फुटाईदिएको आरोप लगाएका छन् ।

जग्गा जमिनलाई मुद्दा बनाएर आनन्द यादवले मण्डललाई जातीय दम्भ देखाउँदै कुटपिट गरेको आरोप लगाईएको छ । आनन्दसँग सम्पर्क गर्ने प्रयास गरिएपनि सम्पर्क हुन सकेनन् ।

यता, ईलाका प्रहरी कार्यालय महेन्द्रनगरले उल्टै आएर आफूलाई धाकधम्की दिएको आरोप लगाएका छन् । टाउको फुटाउने र अँगभँग गर्ने यादवको पक्षमा वकालत गर्दै प्रहरीले आफूलाई धम्काएको आरोप लगाएका छन् । मण्डलले आफूसँग न्याय गर्न अधिकारकर्मी, मानवअधिकारकर्मी, जातीय सँगठनहरुलाई समेत अपिल गरेका छन् ।