जनकपुरः श्रीमानको मृत्यूपछि मिस्त्रीसँग सम्बन्ध, बिहे गर्न भनेपछि विभत्स हत्या

न्यूज ब्यूरो, जनकपुरधाम । मधेश प्रदेशको राजधानी जनकपुरधामक्षेत्रस्थित एक महिलाको हत्यामा सँलग्न एक युवकलाई पक्राउ गरि सार्वजनिक गरिएको छ ।

जिल्ला प्रहरी कार्यालय धनुषाले महिलाको हत्यामा सँलग्न रहेको आरोपमा एक मिस्त्रीलाई पक्राउ गरी सार्वजनिक गरेको हो । मँगलबार जिप्रका धनुषाले मधेश प्रदेश बारा जिल्ला बस्ने २२ बर्षिय ओम मण्डललाई पक्राउ गरेको हो ।

धनुषाको मिथिलाबिहारी नगरपालिका वडा नं. ८ तारापट्टि बस्ने रामचन्द्र दास(मृत्यू) की ४२ बर्षिय श्रीमति उषा दासको हत्या आरोपमा मण्डललाई पक्राउ गरिएको हो । पक्राउ पर्ने मण्डल घर बनाउने राजमिस्त्री हुन् ।

मृतक दासकै घर पछाडी रहेको एक पोखरीमा उनको लास गाडिएको अवस्थामा स्थानीयहरुले देखेपछि प्रहरीलाई खवर गरेको थियो । पोखरीमा लास सडाउन नाँगो पारेर गाडिएको जिल्ला प्रहरी कार्यालय धनुषाले जनाएको छ ।

पत्रकार सम्मेलन गरी धनुषा प्रहरीले हत्या भएको उषा दासको श्रीमान बितेपछि ओम मण्डलसँग सम्बन्ध बसेको उल्लेख गरिएको छ । खवर पाएलगत्तै गएको प्रहरी टोलीले मृतक उषाको लास निकाल्दा उनको हातमा रहेको टयाटु र कानमा लगाएको टबको आधारमा पहिचान गरिएको बताइएको छ ।

महिलाको हत्या भएको जानकारीपछि मृतकका छोरा सोनु दास र उनकी बुहारी मँजु दासलाई पक्राउ गरी अनुसन्धान थालिएको थियो । सोही क्रममा घर बनाउने मिस्त्री ओम मण्डल घरमा आउजाउ गरेको बताएपछि प्रहरीले अनुसन्धान थालेको थियो । प्रहरीले उनको मोबाईलको लोकेशन ट्रयास गरेपछि चितवनबाट पक्राउ गरी अनुसन्धान थालेको थियो ।

मृतक उषाको घरमा समयसमयमा आउने जाने र बस्ने गर्दै आएको बारा जिल्लाको कलैया उपमहानगरपालिका वडा नं. १८ घर भई हाल जनकपुर स्थित घर बनाउने मिस्त्रीको काम गर्ने गोकुल महतो धानुकको छोरा वर्ष अं २२ को ओमलाल मण्डलको संलग्नता रहेको शंका लागेपछि अनुसन्धान अगाडी बढाएको थियो ।

यसरी भयो विभत्स हत्या

आरोपित ओमलाल मण्डल र मृतक उषा दासबीचमा अनैतिक सम्बन्ध रहेको र ओमलाललाई निज मृतकले पटक पटक बिबाह गर्न भनेको तर ओमलालले नमानी पटकपटक टाढा रहन खोज्दा पनि निजलाई महिलाले नै खोजेर जबरजस्ति घरमा ल्याउने गरेको उनको बयानलाई उदृत गर्दै प्रहरीले जनाएको छ ।

गत जेठ २५ गते बिहिबार राति करिब ११ बजेको समयमा आरोपित ओमलाल मण्डल र मृतकबीचमा बिहेकै विषयमा विवाद उत्पन्न हुन गई ओमलालले एक थप्पड हानेको थियो । थप्पड हान्नसाथ उषा बाहिर निस्की भाग्न लाग्दा घाँटीमा समाती घाँटी थिचेर मारेको बताइएको छ । त्यसपछि पोखरीको छेउमा लगि खाल्डो खनि मृतकको लाशलाई चाँडो सडाउनको लागि उषाको कपडा समेत खोली नाङ्गै खल्डोमा गाडी उनको कपडासमेत सोही पोखरीको अर्को छेउमा गाडेको भेटिएको थियो । मृतक महिलाले प्रयोग गरेको मोबाईल समेत पोखरीमै फालेको आरोपित ओमलाल मण्डललाई उदृत गर्दै प्रहरीले जनाएको छ ।

मृतकको कपडा, खाल्डो खन्न प्रयोग भएको बेल्चा बरामद गरिएको हो । उक्त लाशलाई पोष्टमार्टमको लागि प्रादेशिक अस्पताल जनकपुर पठाई अन्य थप अनुसन्धान कार्य जारी रहेको प्रहरीले जनाएको छ ।