ढल्केवरको सतकोणा स्कूलमा निःशुल्क स्वास्थ्य शिविर, करिब २ सय अभिभावक र विद्यार्थी लाभान्वित

न्यूज ब्यूरो, जनकपुरधाम । धनुषाको ढल्केवरस्थित रहेको सतकोणा मोनटेश्वरी प्री स्कूलमा निःशुल्क स्वास्थ्य शिविर गरिएको छ । सोमबार विद्यालयमा बालबालिका र अभिभावकलाई लक्षित गर्दै निःशुल्क स्वास्थ्य शिविर गरिएको हो ।

टेक केयर, हेल्थ केयर नामक सँस्थाको आयोजना तथा सतकोणा प्रि स्कूलको समन्वयमा विहान १० बजेदेखि सुरु भएको निःशुल्क स्वास्थ्य शिविर अपरान्ह ५ बजेसम्म सँचालन भएको थियो । विद्यालय प्रशासनको विशेष समन्वयमा आयोजना गरिएको सो निःशुल्क स्वास्थ्य शिविरमा दाँत, नाक, कान, घाँटी, आँखा र जेनरल फिजिसियन सम्बन्धी सेवा दिइएको थियो ।

बालबालिकाहरुको स्वास्थ्य जाँच, अभिभावकहरुको स्वास्थ्य जाँचको लागि विद्यालयले विभिन्न सँघसँस्था र स्वास्थ्य क्लीनिकसँग समन्वय गरेको विद्यालय प्रशासनका टँक थापाले जानकारी दिए ।

जनकपुरधामस्थित रहेको तराई डेन्टल क्लीनिकको समेत समन्वय र सहयोगमा सँचालन भएको शिविरमा दाँत तर्फ डा. मिसा महासेठ, डी एडमिट पोखरेल, कलाम खान, सीमा साह, कर्मा शेर्पा र कुमारी प्रिती शर्माले बालबालिका तथा अभिभावकहरुको दाँत चेकजाँचको साथै औषधी उपचार समेत गरेको थियो । दाँत निकाल्नुपर्ने बालबालिका वा अभिभावकलाई तत्कालै दाँत निकालिएको थियो भने अन्यलाई औषधी प्रदान गरिएको थियो ।

निःशुल्क स्वास्थ्य शिविरमा जेनेरल फिजिसिएन तर्फ डा. बलराम मण्डल र डा. सुशान्त साहले सेवा दिएका थिए । यस्तै, आँखाको लागि रेयूकाईबाट डा. गँगा सागर साह, शुभ स्वास्तिक हस्पिटलका डा. अमोद अधिकारीले आँखा चेकजाँच गरेका थिए ।

रक्तचाप र सुगर चेकजाँचको लागि नर्सहरुमा सिर्जना कार्की, रोजिना श्रेष्ठ, पासाङ डोमा शेर्पा, पासाङ लामु शेर्पाले सहयोग गरेको थियो । शिविरको क्रममा निःशुल्क औषधी समेत वितरण गरिएको थियो ।

१६ औँ गणतन्त्र दिवसको अवसरमा विद्यालयमा आयोजना गरिएको निःशुल्क स्वास्थ्य शिविरको क्रममा करिब दुई सय जनाले सेवा लिएका हुन् । चेकजाँचको क्रममा थप उपचारको आवश्यक व्यक्तिलाई तराई डेन्टल क्लीनिक जनकपुरमा ५० प्रतिशत छुटमा उपचार गरिने जनाइएको छ ।

विद्यालयको तर्फबाट निरँजन पटेल , अनिल रिजाल र यशोदिप वाने लगायतले सक्रिय सहयोग गरेका थिए । विद्यालयमा निःशुल्क स्वास्थ्य शिविर भएपछि अभिभावकहरु कृतज्ञता प्रकट गरेका थिए ।

उपचार तथा चेकजाँचमा खटेका आगन्तुक चिकित्सक तथा स्वास्थ्य कर्मचारीहरुलाई सम्मान पत्र दिएर सम्मान समेत गरिएको थियो ।