जनमत पार्टीले बनायो आधा दर्जन भातृ सँगठन, जिम्मेवारी समेत तोकियो

न्यूज ब्यूरो, जनकपुरधाम । डा. सिके राउत नेतृत्वको जनमत पार्टीले करिब आधा दर्जन भातृ सँगठनहरु बनाएको छ । सँगठन विस्तारको क्रममा पार्टीले विभिन्न भातृसँगठनहरु बनाउँदै जिम्मेवारी समेत तोकेको हो ।

जनकपुरधामस्थित रहेको पार्टीको केन्द्रीय सचिवालयमा बसेको बैठकबाट विभिन्न भातृसँगठनहरु निर्माण गरिएको छ । धनुषा जिल्ला ईन्चार्ज सुरेन्द्र कुमार मण्डलको अध्यक्षता तथा जनमतका युवा नेता बिपी साहको प्रमुख आतिथ्यमा सँगठनको जिम्मेवारी तोकिएको हो ।

सो क्रममा विभिन्न पार्टी परित्याग गरी छुट्टाछुट्टै समूहमा एक सय जनाभन्दा बढीले जनमत पार्टी प्रवेश गरेका हुन्।

साथै आजकै बैठकबाट केही भातृसंगठनहरुका धनुषा जिल्ला पदाधिकारीहरु तोकिएका छन्।

जनमत पार्टीले युवा जनमत संघ गठन गरी देव कुमार महरालाई सँयोजकको जिम्मेवारी तोकेको हो । सहसँयोजकमा धर्मनाथ साह र इजाज अन्सारीलाई चयन गरिएको छ । यस्तै, चिकित्सक जनमत संघ धनुषा गठन गरी सँयोजकमा डा. अशोक साह, सहसँयोजकमा डा. सुनिल महासेठ र खुसी पाण्डेलाई चयन गरिएको हो ।

खेलकुद जनमत संघको सँयोजकमा ललन यादव, सहसँयोजकमा समसुदिन राजालाई चयन गरिएको छ भने मुस्लिम जनमत सँघको सँयोजकमा हारुल नदाफलाई राखिएको छ ।

अन्य भातृसंगठन एव मोर्चाको जिम्मेवारी भोलिको बैठकबाट तोकिने जनाइएको छ ।