भारतीय नागरिकलाई नेपाली नागरिकता सिफारिस गर्ने वडाध्यक्ष साबिर पक्राउ

न्यूज ब्यूरो, बारा । नक्कली विवरणको आधारमा भारतीय नागरिकको नेपाली नागरिकता सिफारिस गरेको आरोपमा कलैयाका एकजना वडाअध्यक्षसहित ३ जना पक्राउ परेका छन् ।

मावली हजुरबुवाको नामबाट वंशजको आधारमा नागरिकता दिलाउन सिफारिस गरेको आरोपमा कलैया उपमहानगरपालिका वडा नम्बर १० का वडाध्यक्ष महम्मद साबिरसहित ३ जनालाई प्रहरीले पक्राउ गरेको हो ।

वडा अध्यक्ष साबिरसहित नागरिकता लिइसकेका नक्कली बाबुछोरा गरी तीन जनालाई प्रहरीले पक्राउ गरिएको बारा प्रहरीका प्रवक्ता एवम् प्रहरी नायव उपरीक्षक (डिएसपी) पुरुषोत्तम पाण्डेले जानकारी दिए ।

डिएसपी पाण्डेकाअनुसार कलैया१० मटिअर्वा गाउँ भएका ७५ वर्षीय जोधन साह तुराहा र छोरा बनेका २१ वर्षीय रमेश साह तुराहापनि पक्राउ परेका छन् । रमेशले मावलीका हजुरबुबा जोधनलाई बाबु बनाएर ६ महिनाअघि वंशजको आधारमा नागरिकता लिएको खुले पछि उनीहरुलाई पक्राउ गरिएको थियो ।

गोप्य सूचनाको आधारमा अनुसन्धान गर्दै जाँदा उनीहरु पक्राउ गरिएको डिएसपी पाण्डेले बताए । पक्राउ परेका सबैलाई जिल्ला प्रहरी कार्यालयमा हिरासतमा राखेर अनुसन्धान अघि बढाइएको छ ।

नागरिकता सिफारिस गरेका वडाअध्यक्ष साबिरलाई बुधबार नियन्त्रण लिएर अदालतबाट ५ दिनको म्याद थप गरी हिरासतमा राखी अनुसन्धान सुरु गरिएको डिएसपी पाण्डेले बताए ।