शिक्षिकाहरुले लगाइन मेयरविरुद्ध 'मुर्दाबाद'को नारा

न्यूज ब्यूरो, जनकपुरधाम । धनुषाको शहिदनगर नगरपालिकाका मेयर दिनेश प्रसाद यादव विरुद्ध महिला शिक्षिकाहरुले मुर्दावादको नारा लगाएर विरोध जनाएका छन् ।

शहिदनगरको विभिन्न समुदायिक विद्यालयमा अध्ययन अध्ययापन गराउँदै आएकी बालविकाशकी शिक्षिकाहरुले आफूहरुको तबलभत्ता नदिएको भन्दै विरोध जनाएकी हुन् ।

कार्तिक, मँसिर, पुस, माघ, फागुनसम्मको तलबभत्ता नदिएको भन्दै शिक्षिकाहरुले नगरपालिकामा धर्ना दिँदै नगर प्रमुख यादवविरुद्ध मुर्दावादको नारा घन्काएकी हुन् । उनीहरुले शिक्षा शाखा प्रमुख विश्वनाथ यादवविरुद्ध समेत नारावाजी गरेका थिए ।

बालविकास कक्षामा पढाउँदै आएकी शिक्षिकाहरुले यसअघिको आर्थिक बर्षहरुमा तलबभत्ता पाउँदै आएपनि सरकार परिवर्तनपछि तलबभत्ता नदिएको भन्दै विरोध जनाउँदै आएकी हुन् । उनीहरुले तीनदिने अल्टिमेटम दिएर धर्ना समेत बसेकी थिइन् ।

मँगलबार नगरपालिकाको कार्यालय पुगेर शिक्षिकाहरुले तलबभत्ताको माग गर्दै विरोध गरेको थियो । उनीहरुले नगर प्रमुख र शिक्षा शाखा प्रमुखविरुद्ध मुर्दाबादको नारा लगाएकी थिइन् ।

यता, शहिदनगर नगरपालिकाका नगर प्रमुख यादवले शिक्षिकाहरुको कागजपत्र नै अपुग भएको भन्दै तलबभत्ता रोकिएको प्रतिक्रिया दिएका छन् । उनले यसअघि बिना कागजपत्रकै तलबभत्ता दिँदै आएकोमा बेरुजुको समस्या बढेको बताए ।

मेयर यादवले बालविकासकी शिक्षिकाहरुलाई पटक पटक तागेदा गरेपनि कागजात बुझाउन नसकेपछि तलबभत्ता रोकिएको बताउँदै प्रमाण, कागजातहरु पेश गरेपछि भोलीपल्ट नै तलबभत्ता खातामा जाने प्रतिवद्धता जनाए ।

साउन, भदौ र असोजको तलब दिएपछि आफू र नगरपालिकामाथि मुद्दा दिएपछि आफू खोजबिन गर्न थालेको बताए । उनले खोजबिनको क्रममा कसैसँग कागजात नभएको पाएपछि तलबभत्ता रोकिएको बताए ।

सो क्रममा शिक्षा शाखा प्रमुख विश्वनाथ यादवले तीन पटक तागेदा गरिएपनि कागजात पेश नगरेको बताए । उनले शिक्षा कार्यालयबाट चाहिने कागजात पनि नभएको जनाउँदै प्रमाणित पेश भएमा तलब दिइन्े जानकारी दिए ।

यसअघि ६९ जनाको तलब दिँदै आएकोमा केही जनाका नाम समेत फरक पाएपछि तत्कालै तलबभत्ता रोकिएको बताए ।