निःशुल्क शिविर सेवाको लागि नागरिक उत्साहित हुनुपर्छ: वडाध्यक्ष यादव

न्यूज ब्यूरो, जनकपुरधाम । धनुषाको कमला नगरपालिका वडा नं. ३ का वडाध्यक्ष रामभगत यादव (भक्ति) ले निःशुल्क स्वास्थ शिविरमा आम नागरिकको अपेक्षाकृत उत्साह हुनुपर्ने बताएका छन् ।

जनकपुरस्थित रिसिका हेल्थ केयर, सूर्य क्लीनिक, सूर्यतारा डायबिटिज थाईराईड, एण्ड ईण्डोक्राईन सेन्टरको आयोजना एवम् वडाध्यक्ष यादवको सहआयोजनामा भएको एक दिने निःशुल्क शिविरमा करिब ३०० जनाले सेवा लिएका छन् ।

विभिन्न रोगहरुको निःशुल्क चेकजाँच, औषधी वितरणमा वडा नं. ३ सहित विभिन्न वडाबाट सयौँको सँख्यामा सेवाग्राहीहरुले सेवा लिएको वडाध्यक्ष यादवले बताए । उनका अनुसार, निःशुल्क शिविर भन्ने वित्तिकै फोकटिया हुने भनेर चलेको भ्रमले अझै जनताहरु उत्साहित नभएको गुनासो गरे ।

उनले प्रचार प्रसारको केही कमि भएको महसुस गर्दै आगामी दिनमा वडावासीहरुलाई केन्द्रीत गर्दै निःशुल्क स्वास्थ्य शिविर ल्याउने प्रतिवद्धता समेत जाहेर गरे । उनले सोही चेकजाँचको लागि जनकपुर वा अन्य नीजि क्लीनकमा हजारौँ रुपैयाँ तिर्नुपर्ने बाध्यतालाई न्यून गर्न तथा सेवा प्रदान गर्न निःशुल्क शिविर ल्याउने गरेको बताए ।

वडाध्यक्ष यादवको अध्यक्षता एवम् नगर प्रमुख विशेश्वर यादवको प्रमुख आतिथ्यमा भएको एक दिने शिविरको क्रममा नगरपालिकाको विभिन्न वडाका महिला, पुरुष, युवक, युवतिहरुले सेवा लिएको थियो ।

शिविरमा दक्ष एवम् अनुभवी चिकित्सकहरुले सेवा दिएका थिए । केही दिनमै पुनः निःशुल्क स्वास्थ्य शिविर चलाउने वडाध्यक्ष यादवले बताए । शिविर कमला नगरपालिका वडा नं. २ माचि स्वास्थ्यचौकीमा भएको थियो ।

शिविरमा कमला नगरपालिका वडा नं. १ का वडाध्यक्ष सरददेव यादव, वडा नं. ८ का वडाध्यक्ष तृपित भुडेर लगायत स्वास्थ्य कर्मचारीहरुको सहभागिता रहेको थियो ।