सर्वसाधारणको भेषमा मुख्यमन्त्री यादवको छडके

न्यूज ब्यूरो, जनकपुरधाम । प्रादेशिक अस्पताल जनकपुरमा मधेश प्रदेशका मुख्यमन्त्री सरोजकुमार यादवले छडके गरेका छन् ।

मंगलबार राति ११ बजेतिर प्रादेशिक अस्पताल जनकपुरधामको आकस्मिक लगायत अन्य कक्षको अनुगमन गरे । अनुगमनको क्रममा ड्युटीमा रहेका चिकित्सक र कर्मचारीहरुलाई बिरामीको उपचारमा कुनै पनि प्रकारको लापरबाही सह्य नहुने बताउँदै सेवा प्रवाहमा तदारुकता देखाउन निर्देशन दिए ।

उनले सर्वसाधारणको भेष बनाएर बिना सुरक्षा अस्पतालको छडके गरेका छन् । अस्पतालमा अनियमितता, विरामीलाई झन पीडा, डाक्टरहरुको लापरवाही, ल्याबको लापरवाहीको गुनासो बढेपछि उनले सर्वसाधारणको भेष बनाएर छडके गरेका हुन् ।

अस्पतालको विभिन्न वार्डमा पुगेर मुख्यमन्त्री यादवले अस्पतालको मुवायना गरे । विभिन्न समयमा सँचारमाध्यमहरुका जनकपुर प्रादेशिक अस्पताल (पुरानो अँचल अस्पताल) मा कर्मचारीहरुको चरम लापरवाही बढेको जनगुनासो बढेपछि मुख्यमन्त्री यादव आफैँ छडके गरेका हुन् ।

सो क्रममा उनले विरामीहरुसँग अवस्था, अस्पतालको सेवासुविधाको बारेमा जानकारी लिएका थिए । मुख्यमन्त्रीको यो कार्यलाई समाजिक सँजालमा प्रशँसा गरिएको छ ।