मिर्चैयाः सार्वजनिक शौचालयमा ताला, बाहिरै शौच गर्न बाध्य सर्वसाधारण

बिनय यादव/न्यूज ब्यूरो ||

सिरहा, २५ बैशाख । सिरहाको मिर्चैयामा रहेकोे सार्बजनिक शौचालय प्रयोग बिहिन बनेका छन् । मिर्चैया नगरपालिका वडा नं. ६ स्थित कटारी चौकमा रहेको पक्की सार्वजनिक शौचालाय व्यवस्थापनको अभावमा प्रयोग बिहिन बनेको हो ।

सिरहा जिल्ला प्रदेश नं. २ कै प्रथम खुल्ला दिशा मुक्त जिल्लाको रुपमा घोषणा भईसकेको भएपनि मिर्चैयाको व्यस्त बजार कटारी चौकमा बनाईएको सार्वजनिक शौचालयमा ताला झुन्डिएको छ ।

विभिन्न ठाउँहरुबाट मिर्चैया आउने सर्वसाधारण सार्वजनिक शौचालय नदेखेपछि खुल्ला ठाउँहरुमा दिशा पिसाब गरिरहेको देखिन्छन् । सार्बजनिक सौचालयको प्रयोग नहुँदा जताततै दिसा र पिसावले गर्दा दुर्गन्ध फैलिएको छ ।

यात्रुहरुको चाप हुने स्थानमा सुबिधाको लागि बनाईएको शौचालयमा सरोकारबालाको चरम लापरबाहीका कारण ताला झुन्डिँदा सेवाग्राहीहरु बाहिरै शौच गर्न बाध्य बनेका हुन् ।

फरकफरक ठाउँहरुबाट मिर्चैया आउने बिरामी, कुरुवा, व्यापारी, सर्वसाधारण तथा स्थानीयबासीहरुले सार्वजनिक शौचालय नभेटेपछि दिशा-पिसाब चेपेर पनि बस्नु परेको गुनासो पोख्छन् ।

मिर्चैया नगरपालिका ६ स्थित करीब ४ धूर क्षेत्रफलको जमिनमा सहरी बिकास मन्त्रालयको कुल १० लाख र जिल्ला बिकास समितिबाट २ लाख गरी कुल १२ लाखको लागतमा सार्वजनिक सौचालय निर्माण भई वि. स. २०७१ सालमा सार्वजनिक सौचालय मिर्चैया नगरपालीकालाई जिम्मा लगाइएको थियो ।

स्थानीयहरुको आँखामा छारो हाल्नलाई सार्वजनिक सौचालयको निर्माण गरेको र निर्माण गरिसकेपछि कसैले चासो नदिँदा शौचालयको अबस्था निकै जिर्ण बन्न पुगेको एक स्थानीयले बताए । उनले भने ‘कुनै काम बिशेषले मिर्चैया आउँदा शौच गर्नको लागि सौचालयको राम्रो व्यवस्था नहुँदा सर्वसाधारणलाई धेरै असहज हुने गरेको छ, सौचालय भएको भएपनि प्रयोगबिहिन छन्, यसरी यस्तो अस्तव्यस्त ठाउँमा सार्बजनिक सौचालय नहुँनु भनेको लज्जास्पद कुरा हो, भएको सौचालयहरुको लागि चौकिदार राखेर अथवा स्थानीयतहले कुनै कर्मचारी राखेर फेरि सुचारु गर्न सकेमा बजारमा केहि मात्रामा भएपनि दुर्गन्ध हट्ने थियो ।’ उनले बताए ।

यता, मिर्चैया नगरपालिकाका नगरप्रमुख श्रवण कुमार यादवले नगरपालिका क्षेत्रभित्र पर्ने सार्वजनिक सौचालयहरुको अबस्था हेरफेर गरेर चाँडै पुनः प्रयोगमा ल्याउने तयारी गरिएको बताउनुभयो ।