धनुषाधामको मकर मेलामा व्यापारीबाट पैसा नलिन मेयर मण्डलको निर्देशन

न्यूज ब्यूरो, जनकपुरधाम । एक महिनासम्म (माघ महिनाभरि) लाग्ने विशाल मकर मेलामा व्यापारीहरुबाट कुनै प्रकारको पैसा असुल नगर्न निर्देशन दिएका छन् ।

धनुषाधामस्थित महिनाभरि लाग्ने मकर मेलामा विभिन्न स्थानबाट आएका व्यापारीहरुले स्थानीयको घर अगाडी पसल थाप्दा पैसा असुल्ने गरेको जनगुनासो आएपछि उनले कुनै प्रकारको रकम नलिन निर्देशन दिएका छन् ।

सोमबार धनुषाधाम नगरपालिकाको तर्फबाट एक प्रेस विज्ञप्ति जारी गर्दै मेयर मण्डलले धनुषामा ऐतिहासिक मकर मेलामा व्यापार गर्न आएका कुनै पनि व्यापारीबाट कुनै प्रकारको रकम नमाग्न, नलिन, न असुल गर्न धनुषाधामवासीलाई आग्रह समेत गरेका छन् ।

एक महिनासम्म लाग्ने मकर मेलामा आउने व्यापारीहरुले गर्दा धनुषाधामवासीले व्यापारिक दृष्टिकोणले समेत आर्थिकोपार्जन गर्न अवसर मिलेको भन्दै मेयर मण्डलले जस कसैको घर अगाडी पनि पसल थापे कुनै प्रकारको रकम नलिन आग्रह गरेका छन् ।

यसका साथै, सो सूचनालाई अवहेलना गरी व्यापारीबाट रकम असुलेको गुनासो आए सोही बमोजिम कानुनी कारवाही गर्ने चेतावनी समेत दिएका छन् ।