कमला नगरपालिकामा निःशुल्क स्वास्थ्य शिविर हुँदै, ब्लड टेष्टदेखि भिडियो एक्सरे पनि गरिने

न्यूज ब्यूरो, जनकपुरधाम । पूर्वी धनुषाको कमला नगरपालिकास्थित निःशुल्क (फ्री) स्वास्थ्य चेकजाँच शिविर हुने भएको छ ।

आउँदो पुस २२ गते शुक्रबार र २३ गते शनिबार गरी दुई दिन निःशुल्क स्वास्थ्य शिविर हुने भएको छ ।

जनकपुरधामस्थित रहेको सूर्यतारा डायबिटिस थाईराईड एण्ड ईन्डोक्राईन सेन्टर प्रा.लि. को आयोजनामा दुई दिने निःशुल्क स्वास्थ्य शिविर हुने भएको छ ।

डेढ दर्जन विशेष डाक्टरहरुको टोलीले कमला नगरपालिकावासीलाई दुई दिनसम्म सबै सेवाहरु निःशुल्क दिने आयोजक क्लीनिकका सँचालक डा. सितेश गोईतले जानकारी दिए ।

डाक्टर गोईतका अनुसार, दुई दिने निःशुल्क चेकजाँच शिविरको क्रममा ब्लड टेस्ट, किडनी, लिभर, पिसाब टेष्टको साथै ईसिजी, अल्ट्राउण्ड (भिडियो एक्सरे) समेत निःशुल्क गर्ने भएको छ ।

विभिन्न क्षेत्रका विशेषज्ञ डाक्टरहरुले शिविरमा सहभागी हुने विरामीलाई फोक्सी चेकजाँच समेतको व्यवस्था मिलाएको डा. गोईतले जानकारी दिए ।

आउँदो शुक्रबार र शनिबार बिहान १० बजेदेखि दिउँसो ४ बजेसम्म कमला नगरपालिका वडा नम्बर ३ लगमाको हनुमानचोक मन्दिर परिसरमा स्वास्थ्य शिविर सँचालन हुने बताइएको छ ।

सो शिविरमा विरामीहरुलाई निःशुल्क चेकजाँचको साथै औषधी समेत निःशुल्क प्रदान गरिने जनाइएको छ ।