जनकपुरमा अब जग्गाको लालपूर्जासँगै विरुवा वितरण

न्यूज ब्यूरो, जनकपुरधाम । मधेश प्रदेशको धनुषामा पर्यावरण अभियानीहरुले जग्गाधनीको लालपूर्जासँगै विरुवा वितरण अभियान थालेको छ ।

नापी कार्यालय धनुषाले शुक्रबारदेखि जग्गाधनीलाई लालपूर्जाको साथै एक विरुवा समेत दिन थालेको छ । जग्गाधनीहरुलाई पर्यावरण बचाउने अभियानमा सहयोग गर्न एक लालपूर्जा एक विरुवा अभियान थालेको हो ।

धनुषाका वन अधिकृर्त एवम् पर्यावरण अभियानी समेत रहेका सुरेश शर्माले ट्रायलको रुपमा कार्यालयले गत आर्थिक वर्षमा साबिकको देउरी परबाहामा लालपूर्जासंगै विरुवा बितरण गर्दा जनमानसमा सकारात्मक उत्साह प्रदान गरेको बताए । उनले यस आर्थिक बर्ष पनि निरन्तरता दिइएको नापी कार्यालय प्रमुख सुमन मिश्रालाई उदृत गर्दै जानकारी दिए ।

शुक्रवार र शनिवार जनकपुरधाम उपमहा नगरपालिका वडा नम्बर २५ (साविक लोहना) मा १ पूर्जा १ विरुवा बितरण गरेको थियो । लालपूर्जा वितरणसंगै पर्यावरण संरक्षण अभियानलाई जोडन विरुवा वितरण गरेका छन् ।

सो दुई दिनमा करिब ६ सय जग्गा धनी प्रमाणपत्र (लालपूर्जा) संगै ६ सय विभिन्न जातका विरुवाहरु बितरण गरिएको थियो । उक्त कार्यका लागि अभिप्रेरित गर्ने वन अधिकृत सुरेश शर्मा, बिरुवा उपलब्ध गराउने डिभिजन वन कार्यालय धनुषाले उत्साह पूर्वक सहभागी सम्पुर्ण स्थानीय बासिन्दा प्रति आभार सहित धन्यवाद ज्ञापन गरेका थिए ।

चालु आर्थिक बर्षमा १० हजार लालपूर्जा संगै १० हजार विरुवा बितरण गरिने अमिन रामडुलर साहले बताए । लालपूर्जा संगै विरुवा बितरण प्रति स्थानीय वडाध्यक्ष, बुद्धिजिवी, नागरिक समाज, महिला लगायत सम्पूर्ण स्थानीयवासी खुशी प्रकट गर्दै धन्यवाद सहित भविष्यमा समेत पर्यावरण संरक्षण अभियानमा आफूहरूको सहयोग र सहकार्य रहने प्रतिबद्धता ब्यक्त गरेका थिए ।