विकासको नाममा वातावरण विनाश हुँदैछः वक्ताहरु

न्यूज ब्यूरो, जनकपुरधाम । तराई मधेशसहित नेपालभरिमा विकासको नाममा वातावरण विनाश हुन लागेको जिकिर वातावरण अभियन्ताहरुले गरेका छन् ।

मानव अधिकार दिवसको उपलक्ष्यमा युवाहरुले कचहरी बहसको आयोजना वातावरणप्रेमीहरुले अहिले विकासको नाम दिएर वातावरण विनाश गर्न लागेको आरोप लगाएका छन् ।

मानव अधिकार तथा वातावरण अधिकारलाई सुनिश्चित गर्न खुल्ला रुपमा जनकपुरधामको जनकचौकमा आयोजना गरिएको बहसमा वातावरणप्रेमीहरुले विकासलाई नयाँ शिराबाट माथि लग्नुपर्ने धारणा राखेका थिए ।

वातावरण अभियान्ता देव नारायण मण्डलले सम्पूर्ण तवरमा वातावरण जोगाउन जनताले साथ दिएपनि सरोकारवालाले अपनत्व नगरेको बताए ।

उनले वातावरण सबैको लागि आवश्यक रहँदा र जनताले संरक्षण गरेपनि विकास र समृद्धिको नाममा विनाश भईरहेको जिकिर गरे । “निलगाई, वदेल लगायत जिवको अस्तित्व नै समाप्त भईरहेको हुनाले आगामी दिनमा फसलका लागि मारामारी हुने छ ।”– उनले थपे ।

कार्यक्रममा उपमेयर किशोरी साहले पर्यावरण संरक्षण तथा विकासका क्रमिक विकासमा कार्य सुरु गरेको बताए । उनले नगरपालिकाले निश्चित नीति तथा कार्यक्रमहरुको तय गरेर नै कार्यक्रम ल्याइरहेको जनाउँदै परिवर्तन गर्न र हेर्न चाहेका सबैले आ–आफ्नो तर्फबाट पनि योगदान दिनुपर्ने बताए ।

आयोगका प्रमुख खतिवडाले स्वच्छ वातावरणमा बस्न पाउने अधिकारको सुनिश्चितता हुनुपर्नेमा जोड दिए । जसका लागि आफ्नो अधिकारसंगै अरुको अधिकारको पनि सुनिश्चितता गर्नुपर्ने बताए ।

कार्यक्रम सेभ द चिल्ड्रेन र डब्लु डब्लु एफ नेपालको सहयोगमा युथ एड्भोकेसी नेपालको सहकार्यमा कायापलटले जनक चौकमा खुल्ला रुपमा कचहरी आयोजना गरेको कार्यक्रम संयोजक दिवाकर उप्रेतीले बताए । उनले भने, “बहसलाई युवा पुस्ताले बिर्सिएकोले ब्युझाउँन पर्ने हेतु सुरुवात गरेको हौ । खुल्ला छलफल तथा अन्तरक्रियाले जस्तो पनि समस्या हल गर्न सक्छ ।” उनले समय समयमा यस्ता बहसले सरोकारवालालाई खबरदारी गरिरहने समेत बताए ।

साथै बहसको अन्त्यमा कायापलटले दवाव स्वरुप वातावरण संरक्षण गर्न तथा समुदायमा जलवायु परिवर्तन न्युनिकरण गर्न सन्देश प्रवाह हेतु ११ बुँदे ज्ञापन पत्र जनकपुरधाम उपमहानगरपालिकाका उपमेयर किशोरी साहलाई हस्तान्तरण गरिएका थिए । जसमा जलवायु न्याय देखि समुदायलाई वातावरण शिक्षा तथा विद्यालयलाई प्लास्टिक मुक्त क्षेत्र घोषणा गर्न पर्ने मुद्दा रहेको उप्रेतीले बताए ।

कायापलटको आयोजनामा गरिएको बहसमा मानव अधिकार आयोग, मधेश प्रदेशकी मन्जु खतिवडा, जनकपुरधाम उपमहानगरपालिकाका उपमेयर किशोरी साह र जलवायु परिवर्तन न्युनिकरणका अभियान्ता देव नारायण मण्डल वक्ताको रुपमा रहेका थिए भने कायापलटका कार्यक्रम संयोजक दिवाकर उप्रेतीले सहजिकरण गरेका थिए ।

त्यस्तै उनले पोखरी संरक्षण तथा सडकलाई छाडा चौपाया मुक्त बनाउन कार्य अगाडि बडेको जोड दिए भने सहभागीबाट उठेका प्रश्नमा उनले प्रशिक्षणकालमै रहेको हुनाले बुझ्ने र व्यवस्थापन गर्ने कार्य सन्चालन रहेको बताए ।

जसमा स्थानीय अधिकारकर्मी तथा बुद्धिजीवीको सहभागीता रहेको थियो ।