ग्रामिण भेकमा महिला स्वास्थ्य स्वयंसेविकाको ठुलो भूमिकाः मेयर यादव

न्यूज ब्यूरो, जनकपुरधाम । धनुषाको कमला नगरपालिकाका मेयर विशेश्वर प्रसाद यादवले ग्रामिण भेकमा महिला स्वयंसेविकाको ठुलो भूमिका रहेको बताएका छन् ।

सोमबार १९औँ महिला सामुदायिक स्वास्थ्य स्वयंसेविका दिवसका अवसरमा कमला नगरपालिकाको नव निर्मित प्रशासकीय भवनमा आयोजित कार्यक्रममा बोल्दै मेयर यादवले स्वास्थ्य क्षेत्रलाई झन मजबुत बनाउन महिला स्वयंसेविकाहरुको भूमिका अहम रहेको बताए ।

नेपालमा महिला स्वास्थ्य स्वयंसेविकाको भूमिकाकै कारण स्वास्थ्य क्षेत्रमा अपेक्षाकृत परिणाम देखिएको बताए । उनले गाउँ घरमा असल मिडियाकर्मीको भूमिका निर्वाह गर्ने महिला स्वयंसेविकाहरुले उचीत सम्मान अझै पाउन नसकेको बताए ।

समुदायमा स्वास्थ्यबारे न्यून चेतना भएका बेलामा घर–घरमै पुगेर सेवा दिँदै मातृमृत्यु, नवजात शिशुको मृत्यु, बाल मृत्यु घटाउन महिला स्वास्थ्य स्वयंसेविकाको अहम भूमिका रहेको उनले बताए ।

कमला नगरपालिकाका स्वास्थ्य शाखा प्रमुख रामकुमार ठाकुरको अध्यक्षतामा सम्पन्न भएको १९ औँ महिला समुदायिक स्वास्थ्य स्वयंसेविका दिवसको अवसरमा कमला नगरपालिकाले स्वयंसेविका परिचालन र त्यसबाट भएको अपेक्षाकृत परिणामको बारेमा सुनाएको थियो ।

महिला स्वयंसेविकाहरुको भुमिका समाजमा अहम रहेको बताउँदै स्वास्थ्य शाखा प्रमुख ठाकुरले पूर्वाधार विकाससँगै, प्रविधि विकाससँगै स्वयंसेविकाहरुलाई परिचालन गर्नुपर्ने आवश्यकता औल्याए ।

कार्यक्रममा नगरपालिकाभरिको महिला स्वयंसेविका, स्वास्थ्य शाखा उपसँयोजक अमरेश कुमार यादव, उपमेयर शिला देवी मण्डल लगायत अन्य कर्मचारीहरुको उपस्थिति रहेको थियो ।