डा. सिके राउत संघीयता खतरामा पार्ने शंकाः जसपा नेता यादव

न्यूज ब्यूरो, जनकपुरधाम । मधेश सरकारका पूर्व राज्य मन्त्री योगेन्द्र राय यादवले डा. सिके राउत र रवि लामिछानेको आगमनले संघीयता खतरामा पर्ने शंका जनाएका छन् ।

रौतहट निर्वाचन क्षेत्र नम्बर १ (ख) बाट प्रत्यासी उम्मेदवार समेत रहेका यादवले डा. सिके राउतले युवाहरुलाई इमोश्नल ब्लैकमेल गरी भोँट पाएको पनि जिकिर गरेका छन् ।

उनले आफ्नो फेसबुकमा जनमत पार्टीका राष्ट्रिय अध्यक्ष डा. सिके राउत र राष्ट्रिय स्वतन्त्र पार्टीका अध्यक्ष रवि लामिछानेको जिकिर गर्दै प्राप्त उपलब्ध गुम्ने खतरा रहेको शंका व्यक्त गरेका छन् ।

पृथकतावादको राजनीति पराजित भएका प्रमाण विश्वमा देख्दै गर्दा नेपालमा पछिल्लो समयमा अलग मधेशको कल्पन्ना र भावनात्मक मुद्दामार्फत राजनिती प्रचारबाजी मार्फत कतिपयले आशिंक मात्रामा सफल पनि भएको भन्दै टिकाउन नहुने बताएका छन् ।

उनले फोरम र उपेन्द्र यादवको मधेश बिद्रोहले कम्तीमा समावेशिता , समानुपातिक प्रतिनिधित्व , आरक्षण, सामाजिक लोकतन्त्र र संघीयतालाई संस्थागत गर्न सफल हुन पुगेको जिकिर गरेका छन् ।

सोही क्रममा यादवले सिके राउतका कथित उदयले प्राप्त उपलब्धिको अन्त्य हुने शंका जाहेर गरेका छन् । स्वराज, अलग मधेश राज्यका कल्पना गर्दै युवाहरुलाई इमोश्नल ब्लैकमेल गरि मत पाएका सिके राउतका सत्तामा जाने छरपटाहटले शंका पैदा भएको बताएका छन् ।

“उपेन्द्र यादवको मधेश बिद्रोहले संघीयता, समावेशिता, समानुपातिक प्रतिनिधित्व, सामाजिक लोकतन्त्र बैधानिकरुपमा स्थापित भएका छन र सिके राउतको संसदीय प्रवेशले कांग्रेससहितका सरकारमा सता प्राप्तिका लागि आतुरता देखिएका छन । स्वतन्त्र मधेश, स्वराजलगायतका भावनात्मक एजेन्डाहरु फगत सताका लागि दस्तावेज र भाषणका लागि आधारबाहेक केही नरहेको मेरो बुझाई छ। संयोगवश र उपेन्द्र ,ठाकुर, महतोहरुको आपसी असमझदारीका उपज सिके हुन। नयाँ शक्तिको उदय भन्न हतार होला जस्तो मलाई लाग्दैछ। सामाजिक संजालमा सिकेका फोटो देखिदै गर्दा मैले बुझेका र अनुभुति गरेका राजनीतिका बारेमा थोरै चिन्तन गर्दा रवि लामिछानेका स्वतन्त्र पार्टीको सन्दर्भमा समेत सोच्न म बाध्य भएको छु। रवि लामिछानेले प्रदेश सभामा उम्मेदवारवारी नदिनु, सिकेले अलग मधेशको नाराबाट संघीयताबिरोधीहरुसंग सत्ताका लागि ललायित हुनुले संघियताको अस्तित्वप्रति खतरा हुने सवालमा मेरो मस्तिष्कमा शंका उत्पन्न भएका छन।”– उनले लेखेका छन् ।