सिरहामा एमालियनहरुको जीतको उन्माद, पराजीत उम्मेदवारको घरमा ढुँगा, तीन दिनदेखि चक्काजाम

न्यूज ब्यूरो, सिरहा । सिरहा जिल्लामा निर्वाचित भएका उम्मेदवारका कार्यकर्ताहरुले जीतको उन्मादले प्रत्यासी उम्मेदवारको घरमा ढुँगामुढा गरेपछि निरन्तर तीनदिनदेखि चक्काजाम हुँदै आएको छ ।

सिरहामा प्रतिनिधिसभा सदस्य निर्वाचन क्षेत्र नम्बर ३ मा एमालेका लीलानाथ श्रेष्ठ निर्वाचित भएपछिको उन्मादमा नेकपा एमालेका कार्यकर्ताले निकटतम् प्रतिद्वन्द्वीको घरमा शुक्रबार साँझ ढुंगामुढा गरेपछि विवाद बढेको हो ।

एमालेका लिलानाथ श्रेष्ठले सत्ता गठबन्धन अन्तर्गत माओवादी केन्द्रका विश्वनाथ साहलाई एक हजार एक सय ८२ मतान्तरले पछि पार्दै आफ्नो जित निकालेपछिको उन्मादमा एमाले कार्यकर्ताहरुले गोलबजार ४ मा घर भएका साहको घरमा साँझ साढे ६ बजेतिर ढुंगामुढा गरेको थियो ।

आफ्ना नेताको घरमा ढुंगामुढा भएको विरोधमा माओवादी केन्द्रले शुक्रबार साँझ साढे ७ बजेदेखि पूर्व पश्चिम राजमार्ग अन्तर्गत गोलबजार खण्ड टायर बालेर अवरुद्ध गर्दै आएको छ ।

सोही क्रममा आज पनि पूर्व–पश्चिम राजमार्गमा केही बेर चक्काजाम गरेको हो । नेपाली काँग्रेस निकट तरुण दल, युवा सँघ नेपाल र माओवादी केन्द्रको भातृ सँगठन वाईसिएलले सँयुक्त प्रेस विज्ञप्ति जारी गर्दै सोको विरोध गरी दोषीलाई कारवाहीको माग गरेको छ ।

जीतको उन्मादमा मातेकाहरुले गरेको कार्यको लागि कानुनी दायरामा ल्याउन माग गर्दै कारवाही नगरिए आफूहरु आन्दोलनमा जाने चेतावनी दिएको हो ।

वाईसिएल सिरहाका अध्यक्ष विवेक परियार, युवा सँघ नेपाल सिरहाका अध्यक्ष राजेश्वर यादव र तरुण दल सिरहाका अध्यक्ष अरबिन्द मण्डलले सँयुक्त विज्ञप्ति जारी गरेका हुन् ।