उम्मेदवारहरुको बदनियतले सिरहाको चोहर्वा पार्क कुरुप, आचारसंहिता मिचेर दलको झण्डा

न्यूज ब्यूरो, सिरहा । सिरहा जिल्लाको अति व्यस्त चोक भनिएको चोहर्वा चोक (पार्क) लाई राजनीतिक दलका उम्मेदवारहरुले कुरुप बनाएपछि स्थानीयत तातिएका छन् ।

आगामी मँसिर ४ गते हुन लागेको प्रतिनीधिसभा तथा प्रदेशसभा सदस्य निर्वाचनको लागि निर्वाचन आयोगले सार्वजनिक स्थान यस प्रकारले झण्डा, चुनावी प्रचार प्रसारको पम्पलेट झुण्डयाउन नहुने भनेपछि उम्मेदवारहरुले जथाभावी पोष्टर पम्पलेट र झण्डा लगाएर पार्कलाई कुरुप बनाइदिएको हो ।

विभिन्न राजनीतिक दलबाट उम्मेदवारी दिएका उम्मेदवारहरुले चुनावी प्रचार प्रसार भन्दै पार्टीको झण्डा सार्वजनिक पार्कमा अधिक सँख्यामा लगाइदिएपछि पार्क कुरुप बनेको हो ।

पूर्व पश्चिम राजमार्ग अन्तर्गत सिरहाको नयाँ चोहर्वा भनिने सो पार्कमा विभिन्न दलका सयौँ झण्डाहरु झुण्डयाइएको छ । झण्डापछि पार्कको साखको साथै त्यसलाई कुरुप बनाइदिएको गुनासो स्थानीयहरुले गर्न थालेका छन् ।

झण्डा झुण्डयाउन आउनेहरुले दलको धाकधम्की दिँदै बल पूर्वक झण्डा लगाउने गरेको बताइएको छ । सार्वजनिक पार्क भएको ठाउँमा एक वा दुई वटा झण्डा मात्र लगाउनुपर्नेमा सयौँ झण्डा एउटै पार्टीले झुण्डयाएपछि पार्क कुरुप बनेको हो ।

सो पार्कमा नेपाली काँग्रेस, एमाले, नेकपा (समाजवादी) जनमत, जसपा लगायतको पार्टीको झण्डाले पार्कलाई कुरुप बनाइदिएको हो । यसप्रति स्थानीय व्यापारीहरु ती दलहरुप्रति आक्रोसित समेत बनेका छन् ।