जसपाका जिल्ला अध्यक्षले नै छाडे जसपा, स्वतन्त्र भएको घोषणा

न्यूज ब्यूरो, जनकपुरधाम । जसपा नेपालका रौतहट जिल्ला अध्यक्ष धर्मेन्द्र पटेलले पार्टी परित्याग गरेका छन् ।

जसपा नेपालको जिल्ला अध्यक्ष एवं देवाही गोनाही नगरपालिकाको पूर्व मेयर समेत रहेका पटेलले मंगलबार जसपा नेपालको साधारण सदस्य समेत नरहने गरि पार्टी परित्याग गरेका घोषणा गरेका हुन्।

पटेलले स्थानीय चुनाव देखि नै नेतृत्वको गलत गतिविधिका कारण पार्टी परित्याग गरेको बताएका छन्।

नागरिकता विधेयकको विरुद्धमा लागेका नेकपा एमालेसँग जसपा नेपालले आसन्न निर्वाचनका लागि गठबन्धन गरेको र कुर्सी जोगाउन कुनैहद सम्म जाने पार्टीको नेतृत्वसँग असन्तुष्टि जनाउदै पार्टीको साधारण सदस्य समेत नरहने घोषणा गर्दै जिल्ला अध्यक्ष पदबाट राजिनामा दिएका हुन्।

विगत दुई दसक देखि मधेसवादी दलमा आबद्ध भई विभिन्न आन्दोलन तथा मधेस आन्दोलन समेत गरेका अध्यक्ष पटेलले पार्टी परित्याग गरि स्वतन्त्र रुपमा राजनीतिक गर्ने संचार कर्मीलाई जानकारी गराएका हुन्।

उनले समाजिक संजालमा लेखेका छन् “जनता समाजवादी पार्टी, नेपालको साधारण सदस्य समेत नरहने गरी जसपा नेपाल रौतहटको जिल्ला अध्यक्ष पदबाट आजकै मितिदेखि राजिनामा दिएको घोषणा गर्दछु । साथै एउटा राजनैतिक प्राणी भएको हुदाँ देश र मधेसको पक्षमा स्वतंत्र रूपले भएपनि लागि रहने प्रतिबद्धता व्यक्त गर्दछु।”

भनेका छन् ।पटेलले जसपा जस्तो मधेसबादी पार्टीले पार्टीको नीति ,सिधाान्तलाई लत्याउदै मधेस बिरोधि पार्टी एमाले संग गठबन्धन गरेको भन्दै आफुले पार्टी परित्याग गरेको समेत बताएका छन् ।