नेता गिरीको पशुपतिनाथमा अन्त्येष्टि, शोकमा सबै नेपाली

न्यूज ब्यूरो, काठमाडौं । नेपाली कांग्रेसका दिवङ्गत नेता प्रदीप गिरीको आज पशुपतिनाथमा अन्त्येष्टि गरिएको छ। सानेपाबाट सुरु भएको शवयात्रा सातदोबाटो, कोटेश्वर, एयरपोर्ट हुँदै गौशाला भएर पशुपति आर्यघाटमा लगिएको हो।

आर्यघाटमा कांग्रेसका शीर्ष नेता र अन्य दलका शीर्ष नेताहरुले श्रद्धाञ्जली दिएका छन्। समाजवादी चिन्तक एवं कांग्रेस नेता गिरीको शनिबार राति ७५ वर्षको उमेरमा निधन भएको हो। प्रतिनिधिसभा सदस्यसमेत रहेका गिरी पाँच वर्षदेखि घाँटीको क्यान्सर रोगबाट पीडित थिए।

भारतको मुम्बईस्थित हिन्दुजा अस्पतालमा क्यान्सरको उपचार गराएर फर्किएपछि उनको छातीमा निमोनिया संक्रमण देखिएको थियो। त्यसपछि ललितपुरस्थित मेडिसिटी अस्पतालको सघन कक्षमा भेन्टिलेटरमा राखेर उपचार भइरहेको थियो।

उपचारमा संलग्न डा. सन्दर्भ गिरीका अनुसार शनिबार राति ९ बजेर ३० मिनेटमा निधन भएको हो। प्रतिनिधिसभा सदस्य गिरीको पार्थिव शरीरलाई श्रद्धाञ्जली अर्पण गर्न आइतबार बिहान ९ बजेदेखि ११ बजेसम्म मेडिसिटी अस्पताल प्राङ्गण र ११:३० देखि २ बजेसम्म पार्टीको केन्द्रीय कार्यालय सानेपा राखिएको थियो। उनको पार्थिव शरिरमा माल्यार्पण गर्न ठूलो संख्यामा शुभेच्छुक पुगेका थिए।