सिरहाका एक एजेन्ट ९ दिनदेखि बेपत्ता, परिवारमा रुवाबासी

न्यूज ब्यूरो, सिरहा । मधेश प्रदेशको सिरहा जिल्लास्थित बस्ने एक एजेन्ट विगत ९ दिनदेखि बेपत्ता भएका छन् ।

सिरहा जिल्लाको भगवानपुर गाउँपालिका वडा नम्बर २ नहरा गाउँ बस्ने बर्ष ५५ को बालेश्वर साहु तेली विगत ९ दिनदेखि परिवारको सम्पर्कबाट सम्पर्कविहिन भएका छन् ।

गत असार ६ गते शुक्रबार बिहान ११ बजेदेखि नै काठमान्डौँको गौशालास्थितबाट सम्पर्कविहिन भएको उनका छोरा रँजीत कुमार साहले जानकारी दिए ।

शुक्रबार सिरहा भगवानपुर बस्ने शिवन कुमार यादव र चन्दन कुमार यादवको मेडिकलको लागि गौशालाबाट निस्केका एजेन्ट तेली त्यहाँस्थित रहेको रातुपुलबाट सम्पर्कविहिन भएको बताइएको छ ।

गौशालास्थित रहेको रातुपुलस्थितको सपना लजमा बस्दै आएका एजेन्ट तेलीले शिवन र चन्दनको मेडिकल गराउनको लागि बाहिर निस्केका थिए । विहिबार नै गौशाला पुगेका चन्दन र शिवन एजेन्ट बालेश्वरसँगै एउटै कोठामा सुतेको बताइएको छ ।

बिहिबार राती सबै जना सँगै सुतेको लज सँचालकलाई उदृत गर्दै उनको छोरा रँजीत साहले बताए । शुक्रबार अबेरसम्म एजेन्ट बालेश्वर नआएपछि लज सँचालकले उनीहरुलाई बालेश्वरको बारेमा सोधेको थियो ।

चन्दन र शिवनको अनुसार, आफूहरुलाई मेडिकल गराएर एक जनाको फोन आएपछि उनी पुलबाटै फर्केको प्रतिक्रिया दिएका छन् । जरुरी काम पर्यो भन्दै आफूहरुलाई पुलमै छाडेर फिर्ता गएको बताएका छन् ।

यस सन्दर्भमा गौशाला प्रहरीलाई फोन मार्फत जानकारी गराउँदै मान्छे खोजिदिन आग्रह गरिएको बताइएको छ । भोली आईतबार महानगरिय प्रहरी वृत गौशालामा निवेदन दिने जनाइएको छ ।

विगत ९ दिनदेखि नै साह परिवारबाट सम्पर्क विहिन भएपछि घरमा रुवाबासी चलेको छ । विगत दुई बर्षदेखि एजेन्टी पेशामा रहेका उनी अझै सम्पर्कविहिन छन् ।