जसपाबाट अलग्गिएर बाबुराम भट्टराईले खोल्यो नयाँ पार्टी

न्यूज ब्यूरो, काठमान्डौँ । जनता समाजवादी पार्टी (जसपा) बाट अलग्गिएका बाबुराम भट्टराईसहितको समूहले नयाँ पार्टी खोल्ने भएको छ ।

बाबुराम भट्टराईको नेताहरुको समूहले नेपाल समाजवादी पार्टी (नेसपा) गठन गर्ने भएको छ ।

निर्वाचन आयोगले बिहीबार समावेशी लोकतान्त्रिक पार्टीका अध्यक्ष दीपक लामिछानेले गरेको पार्टीको नाम परिवर्तन गर्ने प्रस्तावलाई आयोगले स्वीकृति प्रदान गरेसँगै भट्टराई समूहको नेसपा बन्ने भएको हो ।

“हामीले नाम परिवर्तनका लागि दिएको निवदेनलाई आयोगले स्वीकृत गरेको छ‚” भट्टराईको सचिवालयका विश्वदीप पाण्डेले भने, ुकेही दिनभित्रै बस्ने केन्द्रीय समितिको बैठकले बाँकी कामबारे निर्णय गर्ने छ ।’

जसपाका अध्यक्ष उपेन्द्र यादवसँग विवाद चर्किँदै गएपछि गत फागुन ५ गते भट्टराईनिकट लामिछानेले निर्वाचन आयोगमा समावेशी लोकतान्त्रिक पार्टी दर्ता गराएका थिए ।

उक्त पार्टीको चुनाव चिह्न आँखा रहेको छ । लामिछानेले आयोगमा नाम, झन्डा, छाप परिवर्तन, विधान संशोधनका लागि निवेदन दिएका थिए ।

यादवसँग मतभिन्नता बढेपछि असारको अन्तिम साता भट्टराईले केन्द्रीय कमिटीको विस्तारित बैठक बोलाएका थिए । सो बैठकले पार्टी पुनर्गठन गर्ने निर्णय गरेको थियो ।

त्यसको एक दिनपछि यादवको अध्यक्षतामा पर्साको वीरगन्जमा भएको केन्द्रीय कार्यसमितिको बैठकले भट्टराईसहितका नेताहरूलाई कारबाही गरेको थियो ।