मुख्यमन्त्री राउतको विद्यार्थी भर्ना अभियान बैशाख ५ देखि

न्यूज ब्यूरो ||
जनकपुरधाम, ३० चैत्त । प्रदेश नं. २ का मुख्यमन्त्री लालबाबु राउतले आउँदो बैशाख ५ गतेको विद्यार्थी भर्ना अभियान भव्यताका साथ सफल पार्न सरोकारबालालाई आह्वान गरेका छन् ।

सामाजिक विकास मन्त्रालय प्रदेश–२ ले बिहीबार जनकपुरमा आयोजना गरेको विद्यार्थी भर्ना अभियान २०७५ तथा पाठ्यपुस्तक उपलब्धता सम्बन्धी अन्तरक्रिया कार्यक्रममा बोल्दै कुनै पनि बालबालिका विद्यालयबाट बञ्चित नहोस् भन्ने उद्येश्यले थालिएको राष्ट्र व्यापी अभियानलाई प्रदेश नम्बर–२ मा सही तुल्याउन सबैमा आह्वान गरे ।

बैशाख ५ गते प्रदेश नम्बर २ मा विद्यार्थी भर्ना अभियान भव्यताको साथ मनाइदैछ ।

स्थानीय संघसंस्थासित समन्वय गरेर बाहिर रहेको बालबालिकालाई विद्यालयमा भर्ना गराउनुपर्नेमा उनले जोड दिए ।सबैभन्दा बढी प्रदेश–२ मा दुई लाख बढी बालबालिका विद्यालय बाहिर छन् ।

प्रदेश–२ को शिक्षाको अवस्था डरलाग्दो रहेकोले यसमा सुधार ल्याउने कार्यमा सहयोगको लागि उनले सरोकारबालालाई आह्वान गरे । गरिब, विपन्न र दलितबस्तीमै गएर बालबालिकाहरुलाई विद्यालयमा ल्याउने अभियान संचालन गर्नको लागि उनले जोड दिए ।

भर्ना भएकै दिन बालबालिकाको हातमा पाठ्यपुस्तकसहित पोशाक, स्टेशनरी दिएर आकर्षित गर्ने प्रयास गर्नुपर्ने भनाई उनको थियो ।सामाजिक विकास मन्त्रालयको जिम्मेवारी समेत सम्हाल्नुभएका भौतिक पूर्वाधारमन्त्री जीतेन्द्र सोनलको अध्यक्षतामा भएको अन्तरक्रियामा मुख्यमन्त्री राउतले हालको लागि जिल्लास्तरीय संरचना नभत्काउनको लागि भनेपनि भत्काएर संघीय सरकारले समस्या थपेको बताए ।

अहिले शिक्षा प्रणाली भद्रगोल अवस्थामा छ, उनले भने–‘यसमा सुधार ल्याउनको लागि प्रदेश सरकारले शिक्षा नीति ल्याउँछ ।’ संघीय सरकारले नै ल्याएको नीतिले शिक्षा प्रणाली संचालन गरिने हो भन्ने प्रदेश मन्त्रालयको काम नरहेको उनको तर्क थियो ।

शिक्षा प्रणाली नियन्त्रण र निर्देशन गर्ने काम प्रदेश सरकारको रहेको उनले प्रष्टयाए । शिक्षामन्त्री गिरिराजमणी पोखरेलले प्रदेश–२ मा शिक्षाको स्तर सुधार्नमा प्रदेश सरकारलाई सहयोग गर्ने प्रतिबद्धता जाहेर गरे ।

बैशाख ५ गतेको विद्यार्थी भर्ना अभियानमा संघीय सरकारले सहयोग गर्ने उनले जनाए । प्रदेश सरकारले ल्याएको ‘बेटी पढाउ, बेढी बचाउ’ अभियानको प्रशंसा गर्दै मन्त्री पोखरेलले अभियान अघि बढाउन आग्रह गरे । जनकपुर टुडेमा समाचार छ ।