धनुषाको धनुषाधाम संरक्षित वनमा आगलगी, ठुलो क्षति हुनबाट जोगियो

न्यूज ब्यूरो, जनकपुरधाम । धनुषाधामस्थित रहेको धनुषाधाम संरक्षित वनमा आज (सोमबार) दिउँसो आगलगी हुँदा केही बोटविरुवाको नोक्सानी भएको छ ।

सोमबार भएको सो आगलगीबाट २.५ हेक्टरको स–साना बोटविरुहरुमा नोक्सानी भएको हो । झाडी र बुटयानमा नोक्सानी भएपनि ठुलो सँख्यामा जैविक विविद्यताको नोक्सानी हुनबाट जोगिएको हो ।

धनुषाधाम वनमा आगलगी भएको खवर पाएलगत्तै जिल्ला वन कार्यालयबाट पर्यावरण अभियानी सुरेश शर्माको नेतृत्वमा गएको टोलीले नियन्त्रणको प्रयास गरेको थियो ।

शर्माले धनुषाधाम नगरपालिका, गणेशमान चारनाथ नगरपालिकाको दमकल समयमै बोलाएर नियन्त्रण गर्ने प्रयास गरेका थिए ।

यसका साथै, मिथिला वाईल्ड लाईफ ट्रस्टका पदाधिकारी, सशस्त्र प्रहरी, सशस्त्र प्रहरीका सक्कल दर्जा, जनपद प्रहरीको विशेष प्रयासले समयमै आगलगी नियन्त्रणमा लिएको शर्माले जानकारी दिए ।

सो क्रममा धनुषाधाम संरक्षित वन परिषद्का सदस्यहरु, डिविजन वन कार्यालय धनुषाका पदाधिकारीहरुको सँयुक्त प्रयासले समयमै आगो नियन्त्रण गरी ठुलो क्षति हुनबाट जोगाएको हो ।

सो वनमा धनुषाधाम नगरपालिकाले फाल्दै आएको फोहोरबाट आगलगी भएको बताइएको छ । नगरपालिकाले बजारबाट सँकलित फोहोर जँगलमै फाल्न थालेपछि सो फोहोरबाट आगलगी भएको थियो ।