किसानको ११ बुँदे माग बजेटमा राख्न ढिलाई गरे पुनः कडा आन्दोलन हुन्छः उपाध्यक्ष कुशवाहा

न्यूज ब्यूरो, जनकपुरधाम । डा. सिके राउत नेतृत्वको जनमत पार्टीका उपाध्यक्ष बसन्त कुशवाहाले किसानको माग बजेटमा समावेश गर्न ढिलाई गरिए पुनः कडा आन्दोलन गर्ने चेतावनी दिएका छन् ।

स्थानीय तहको चुनाव हुनुभन्दा अघिसम्म आन्दोलनमै रहेका किसानहरुले चुनावपछि पुनः आन्दोलनलाई सक्रियता बढाएको छ ।

जनमत पार्टीका शिर्ष नेताहरुसँग सरकारको गृहमन्त्री बालकृष्ण खाँडसँग भएको किसानको ११ बुँदे मागसहितको सम्झौता अनुसार नयाँ बजेटमा बजेटिकरण गर्ने भनिएपनि अझैसम्म समावेश नगरिएको भन्दै आन्दोलन पुनः चर्काउने चेतावनी उनले दिए ।

न्यूज ब्यूरोसँग कुराकानी गर्दै उपाध्यक्ष कुशवाहाले प्रथम चरणमा विभिन्न जिल्लामा सिडिओमार्फत कृषी मन्त्रालय र प्रधानमन्त्रीको कार्यालयमा ज्ञापन पत्र बुझाउने कार्यक्रम रहँदै आएको भन्दै समयमै सहमति बमोजिमको माग कार्यन्वयन गर्न भने ।

स्थानीय तहको चुनाव अगाडीदेखि नै विगत ८ महिनादेखि निरन्तर आन्दोलनमा रहेका मधेशका किसानहरुको लागि जनमत पार्टीले केही मागहरु बजेटमा समावेश गर्न लगाएको दाबी गरिएको छ ।

बजेट भाषण मार्फत र नीति तथा कार्यक्रम मार्फत किसानहरुको माग अनुसार केही सम्झौता बुँदाहरु समावेश गरिएपनि कार्यन्वयन हालसम्म नभएको भन्दै कुशवाहाले पुनः आन्दोलनकै मार्फतबाट सरकारलाई दबाब दिने बताए ।