रौतहट : ट्याक्टर दुर्घटनामा चालकको मृत्यु

न्यूज ब्यूरो, रौतहट | रौतहटमा ट्याक्टर दुर्घटनामा परेर चालकको मृत्यु भएको छ । दुर्घटनामा परि मृत्यु हुनेमा गरुडा नगरपालिका ६ पठियाहिका महमद सैफुला रहेको इलाका प्रहरी कार्यालय गरुडाका इन्स्पेक्टर वीरेन्द्र पाश्वानले बताएका छन् ।

कटहरिया नगरपालिका १ हर्षाहा गाउँ बाट खर लोड गरेर गएराती घरतर्फ जान लागेको ना०४ त ४१४२ नम्बरको ट्याक्टर लालबकैया नदीको बाँध बाट झन्डै २० फिट तल खेतमा झरेको थियो । चालक सैफुलाको घटनास्थलमै मृत्यु भएको थियो ।

अबेर राती भएको दुर्घटना बारे मानिसलाई थाहा हुन सकेन । आज बिहान १० बजे हर्षाहाका गाउँलेहरू कटहरिया बजार तर्फ जाने क्रममा ट्याक्टर देखेर प्रहरीलाई खबर गरेका थिए।

मृतकको शव पोष्टमार्टमको लागि आज जिल्ला अस्पताल गौर पठाइएको तथा घटना बारे अनुसन्धान भइरहेको इलाका प्रहरी कार्यालय कटहरियाले जनाएको छ ।